"Kaleak berreskuratzeko" deia egin du Pasaia Antifaxistak
Azken asteetan Trintxerpen zabaldu diren mezu eta jarrera arrazista eta xenofoboei kontra egiten aritu den talde antifaxista aurkeztu dute publikoki. Pasaian ere diskurtso faxistak "zirrikitu" bat aurkitu duela salatu dute.
Azken asteetan Trintxerpen izan diren gertakarien harira zabaldu diren mezu arrazista eta xenofoboei kontra egiteko herritar talde bat mobilizatzen hasi zen. Deialdi eta irakurketa ugari egin ditu talde honek anonimoki azken asteetan, eta orain talde gisa aurkeztu dute euren burua: Pasaia Antifaxista izenez aurkeztu dute taldea. Ohar bat bidali diete hedabideei, Pasaian sortu den gatazkaren inguruko irakurketa egin dute.
Lehenik eta behin, taldekoek “argi” utzi nahi izan dute “Pasaian bizi dugun egoera ez dela gertaera isolatu bat”. Azken asteetan “segurtasun ezaren aitzakipean diskurtso faxistek zirrikitua topatu dute gure herrietan”, salatu dute, eta Europatik hedatzen ari diren diskurtso horiek “normaltasunez” entzuten direla herrian: “tabernetan, dendetan, sare sozialetan… kaleak hartu dituzte, mugarik gabe, Afrika iparraldeko biztanleen kontrako jipoien aldeko apologia ere eginez”.
Diskurtso hauek “sistemarentzako traba izan daitekeen edozein pertsona, ideologia edota proiektu seinalatu eta kondenatu” egiten dituztela erantsi dute, “langile klasearen parte diren horiek sistema kapitalistak aurrera daramatzan zapalkuntzak birproduzitzeaz gain hauek areagotzen dituztelarik”, haien arabera.
Horren kontra borrokatzeko garaia dela uste du Pasaia Antifaxistak, “diskurtso hauek sistema kapitalistak aurrera daramatzan zapalkuntza sektorialak ezkutatzen baitituzte: pobrezia estrukturala, klaseen arteko gatazka, herrialde garatuek haien ongizate eatatua sostengatzeko gainontzeko herrialdeak esplotatzeko duten beharra, harreman patriarkalak…”. Azken hamarkadetan faxismoak sistema kapitalista “babestu” duela diote, eta “berau dutenen aberastasunaren pilaketa besterik ez duela bermatzen”.
Guzti horri aurre egiteko jaio da Pasaia Antifaxista. Mobilizatzera deitu dute: “Sistema kapitalistak sortzen dituen errotiko arazoak azaleratu nahi ditugu, kaleak berreskuratu nahi ditugu eta langile klasean sortu nahi duten arrakala gainditu nahi dugu. Beti egongo gara hemen, baian aurkezpen honen bitartez, oldarraldi faxista honen aurrean oraindik hemen gaudela aldarrikatuko dugu, era horretako diskurtsoek ez hemen ez inon tokirik ez dutela erakutsiz. Horretarako ezinbestekoa da Pasaiako bizilagunen konpromisoa eta bide honetan bat egiteko deia luzatzen dizuegu guztioi”.
