Ane Da Silvaren 'Deseo de ser punk' emanaldia, bertan behera
Hilaren 16an abiatuko duten Ikuska jaialdiaren atariko izango zen emanaldia atzeratu behar izan dute. Aurrerago izango da aktore pasaitarra ikusteko aukera.
Datorren hilaren 16ean abiatuko dute aurtengo Ikuska Film Laburren Nazioarteko Erakustaldia. Motorrak berotzen hasteko, larunbat honetan (hilak 9) Ane Da Silva pasaitar aktoreak antzezlan bat eskaini behar zuen San Pedron, baina, udaleko iturrien arabera, “Trintxer Kulturalarekin zerikusirik ez duten arrazoiengatik”, bertan behera utzi behar izan dute. Da Silva ez da larunbatean izango, baina aurrerago eskainiko duela iragarri du udalak.
Deseo de ser punk lana eskaini behar zuen Da Silvak larunbatean. Belen Gopeguiren eleberrian oinarrituta, antzerki-monologo bat sortu du. Esan bezala, aurrerago zuzenean ikusteko aukera izango dute pasaitarrek eta herrira hurbiltzen direnek.
Hilaren 16tik 23ra bitarte luzatuko dute aurtengo Ikuska. Aurki, HITZAk egitarau osoaren berri emango du.
