Xoxolurren espedizioa Lapurdira
Hilaren 17an Itsasuko Mondarrain gainera joateko asmoa dute mendizale lezoarrek. Izen ematea zabalik da, hilaren 14ra arte.
Xoxulur Mendi Klubaren hurrengo irteera Lapurdira izango da. Hilaren 17an zehazki (igandea). Itsasuko Mondarrain gaina bere egitea dute asmo espediziokide lezoarrek, hiru bat orduko bidean, betiere haurren erritmoa errespetatuz, naturaz gozatuz, euskara ahoan, eta ingurukoak ezagutuz. Martxa bukatutakoan inguruko herri batean bazkaldu eta jolasean ariko dira. Izena emateko epea zabalik da. Orki tabernako zerrendan, nahiz taldekideei mezu elektronikoa bidaliz apunta daitezke interesdunak. Hilaren 14ra arteko epea dago horretarako.
17ko 08:30ean dira irtetekoak Ijurkotik. Mendizaleen artean beharbada soberan izan daitezkeen aholkuak eman dituzte, baina edonola ere, beti gogoraraztea komeni diren horietakoak. Adibidez, bi motxila eraman behar direla: bat, ibilbidean zehar behar direnekin (ura, hamaiketakoa…), eta bestea aldatzeko arroparekin eta bazkariarekin; noski, bigarren zorroa autobusean utziko litzateke ibilbidea bitartean. Txangoaren prezioa 10 eurokoa da helduentzat, eta 8koa gaur nahiz gazteentzat.
Aurreko irteera Tolosako Finalista Egunera egin zuten lezoarrek. 43 bat izan ziren proposamenarekin bat egin zutenak (irudikoak dira horietako asko, Uzturre gainean ateratako argazkia da), aspaldiko lezoar kopururik handiena Xoxolurretik esan dutenez. Beraz, hilaren 17koan horiek eta gehiago espero dituzte.
