Azaroan ere ez da txistu doinurik faltako
Lehen ekitaldia larunbatean du Udal txistulari taldeak; kantujira girotzen ariko da.
Udal Txistulari Taldeak ez du hutsik egingo eta herriko kaleak girotuko ditu hilabete honetan ere. Lehen emanaldia, larunbatean bertan izango du, izan ere, Lau Haizetara Euskaltzaleon Topaguneak antolatzen duen Kantujira girotzen ariko da. Hilaren 17an izango du bigarren zita. Diana eta kontzertua egingo ditu orduan Gabierrota auzoan.
Diana 09:30ean izango da; kontzertua, 11:30ean. Jesusen Bihotza adinekoen erresidentzian izango da, eta besteak beste, Ikusi Mendizaleak (Sabin Lopez de Gereño), Tarantela (Pedro Fernandez de Agirre), eta Euskara oi, euskara (Imanol Urbieta Beristain) konposizioak joko dituzte, besteak beste.
Hilaren 24an Santa Zeziliako diana eta kontzertua egingo ditu. Diana Erdialdeko kaleetan barrena egingo du 09:30ean hasita, eta ondoren, Herri arte Eskolako txistu eta perkusio ikasleekin eta herriko beste hainbat txistularirekin batera egingo du kontzertua 12:00etan.
Kontzertu horretan joko dituztenetako batzuk: Antxokoa (Jose Inazio Ansorena), Le Basque / Le Biscayenne (Marin Marais), Txistulariak (Victor Zubizarreta), eta Santa Zeziliako biribilketa (ezezaguna).
