Greba mugagabea hasiko dute Sanmarkoseneko langileek bost kaleratze salatzeko
Hilaren 18tik 20ra greba deitu dute, eta akordiorik ezean, hilaren 25etik aurrera, berriz, greba mugagabeari ekingo diote.
Sanmarkosenen elkarretaratzea joan den maiatzean adinekoen erresidentzietako auzia konpontzeko eskatzeko. Argazkia: Duintasuna Bost langileren kaleratzearen aurka greba mugagabea hasiko dute Sanmarkosene zaharren egoitzako langileek. Ez dira protestak greba mugagabera mugatuko ELA, LAB eta ESK sindikatuek jakinarazi dutenez, izan ere, datorren astean astelehenetik ostiralera manifestazioak, eta auto karabanak antolatu dituzte egunero.
Hilaren 18tik 20ra greba deitu dute, eta akordiorik ezean, hilaren 25etik aurrera, berriz, greba mugagabeari ekingo diote.
Kaleratzeak dira auziaren punturik larriena, baina ez protestara eraman dituen arrazoi bakarra. Izan ere, bost kaleratze horiekin batera, plantillako hogei langileri %60ko lanaldia ezarri nahi die enpresak.
Joan den irailean jakin zuten enpresak hartutako erabakiaren berri langileek, lan ordutegi eta egutegien proposamen baten harira; lan baldintzen aldaketa nabarmen bat proposatu zien langileei sindikatuek azaldu dutenaren arabera, “bertan jasotzen zen 18 langileri lanaldia murrizketaren ezarpena eta beste bost langileren kaleratzea”.
Protesten bidez bi horiek bertan behera uzteaz gain, langile prekariorik gabeko egoitza eredua galdegingo diote Gipuzkoako Foru aldundiari, “halaber, grebaren helburuak bere egin, kaleratzeak ekidin, langile guztiei %100eko lan kontratuak ezarri, eta egutegietan akordioa egitea eskatzen dugu”.
Sanmarkosene zahar egoitzan 125 langile ari dira denera, “gehien-gehienak emakumeak”. Gureak enpresak kudeatzen du zentroa baina eskaintzen dituen 130 plazen %96 aldundiarekin kontzertatutakoak dira. Plaza kopuru egonkorra dela, baina langileen %36ak borondatezkoak ez diren jardunaldi partzialak dituela azaldu dute, eta gaineratu, horrek soldata baxuagoez gain, langileen erabateko prestasuna eta egutegi malgutasuna dakarrela.
Errenteriako Udalari ere eskatu diote sindikatuek “konponbiderako ardura” hartzea: “Herriko langile eta egoiliarrak izanik uste dugu badagokiola”.
Astelehena 11, asteazkena 13 eta ostirala 15ean manifestazioak egingo dituzte langileek Gureak zentralaren aurrean 07:30ean Donsotiako Berio pasealekuan kokatuta dagoen Marugame taberna aurrean, eta Beraungo Eroski aurrean 10:15ean.
Asteartea 12 eta osteguna 14an, berriz, auto karabanak egingo dituzte 16:00etan Iztieta-Ondartxoko Matadero paretik abiatuta.
