Harrobiari aitortza egingo dio Hibaika Egunak
Hibaika Eguna antolatu du lehenengoz arraun elkarteak; oinarrizko kategorietako arraunlariei aitortza egin nahi die, baita Oiartzun Ibaitik jauzi egin eta herriko kaleak hartu ere, "garena herriarekin batera ospatzeko".
Elene Telletxea eta Alejandro Fariña Hibaika Arraun Elkarteko arraunlariak atzoko agerraldian, oinarrizko kategorietako hainbat arraunlarirekin batera. Oiartzun ibaitik eta egoitza duen Mataderotik jauzi egin eta Errenteria-Oreretako kaleak hartuko ditu Hibaika arraun elkarteak hilaren 23an. Egun hori aukeratu du arraun elkarteak bere eguna, Hibaika Eguna egiteko. Lehenengoa izango da, eta helburu behinena, oinarrizko kirolariak, harrobia, eta finean klubaren etorkizuna diren arraunlari gazteenei aitortza egitea da; baina ez hori bakarrik, kluba eta herriaren artean sareak sortu eta harremana estutzea ere jarri dute helburu egun osko jaiaren bidez.
Xehetasunak atzo eman zituen arraun elkarteak, arratsaldean Hibaikaren egoitzan egin zuen agerraldian. Klubaren izenean aritu ziren Elene Telletxea Iarzabal eta Alejandro Fariña Roma arraunlariak. Hibaika “herritik eta herriarentzat” diharduela lanean eta Errenteria-Oreretaren izena “harro” zabaltzen duela lau haizetara esan zuten bi arraunlariek, “Emakume Seniorren arraunaren gorenetik Euskotren Ligan, Gizon Seniorren KAE2 Ligan, eta elkartearen harrobia diren Alebin, Haur, Kadete eta Gazteekin batel txapelketetan”.
Gaur gaurkoz, 100 arraunlari ari dira Errenteria-Oreretako arraun elkartean kategoria ezberdinetan.
Hilaren 23koa klubaren “herri izaera” horretan sakontzeko ariketa izango da horientzat, baita Hibaikako harrobiari aitortza egiteko eguna ere, “izan ere, sinistuta gaude arraunlari gazteenek merezi dutela elkartearen aitortza, baita herriarena ere”. Argi esan zuten biek ala biek, “arraunlari horiek, harrobia, Hibaikaren etorkizuna dira”. Ezinbestekoak dira Hibaikak arraunlariak, baina horiek bezala, zale, bazkide eta babesleak ere “ezinbesteko dituztela” jarri zuten nabarmen: “Ederra da babes hori bandera bat etxera ekarri, edota lorpen batekin herrira iristen garenean jasotzea; zer esanik ez, emaitzak hain aldeko ez direnean marea beltzaren babesa barru-barruraino heltzen zaigunean”.
Hilaren 23koa, lehen Hibaika Eguna izango da; argi esan dute ordea, “gelditzeko dator”.
Egun osoko egitaraua
Egun osoko egitaraua prestatu du egun handirako arraun elkarteak, zabala eta askotarikoa. Hala, 10:00etan hasiko dute egitaraua Koldo Mitxelena ikastetxeko jolastoki estalian antolatu duten ergometro txapelketarekin, “parte hartu nahi duen ororentzat irekia izango da. Ondoren, arraun erakustaldia egingo dute Hibaikako arraunlariek Oiartzun ibaian, Lekuona pareko egurrezko zubiaren inguruan, 11:00etan hasita.
Familia argazkia egingo dute, oraindik lekua zehaztu gabe badute ere 12:30ean, eta ordubete geroago, 13:30ean aurkezpen ekitaldia egingo dute Koldo Mitxelena ikastetxeko jolastokian.
Bazkaria ere ez da faltako. Merkatuzarren izango da 14:30ean, eta bat egin nahi duen herritar ororentzat irekia da hori ere. Txartelak salgai dira jada, Rosmi dendan, Reyna tabernan, eta Bixigarri Gastrotekan; helduen txartelak 22 euroan daude salgai, eta gazteenak, 13 euroan. Zeliakoentzat menua eta barazkijalea ere badira aukeran, eta horietakoren bat behar duenak posta elektronikora mezua bidali beharko du zehaztuz (klik hemen). Bazkalostea girotzeaz, berriz, Iker Rodriguez DJa arduratuko da.
Agerraldia, “ezinbestekoa” duten babesa eskatzeko ere baliatu zuten Hibaikako bi arraunlariek: “Gero eta handiagoa egin nahi dugun marea beltzaren tanta izan zaitezten eskatu nahi dizuegu herritarrei, estropadetara Hibaikaren koloreekin animatzera etorrita, babesle izanda, edota bazkidetuta”. Azken horretarako, Hibaikaren salmenta puntu ofiziala den Rosmi dendara joan eta bazkidetza orria bete baino ez dela egin behar azaldu duten Fariñak eta Telletxeak, “arraun elkartea babestearekin batera, Hibaikaren materiala erosterakoan beherapenak, eta bestelako abantailak jasoko ditu bazkideak”.
Gonbidapen zabal-zabalarekin bukatu zuten agerraldia: “Herritar gutziak animatu nahi zaituztegu gurekin bat egitera, Hibaika Eguna elkarrekin ospatzera hilaren 23an; Herri bat, traineru bat izatera. Gonbidatuta zaudete guztiak”.
