Errigoraren saskiak: beltza, berdea edo gorria?
Jada eska daitezke Errigoraren udazkeneko kanpainaren saskiak. Oarsoaldean horiek jasotzeko hamabi gune egokitu dituzte.
Udazkeneko Nafar hegoaldeko uzta euskarari puzka kanpaina abian du Errigorak. Nafarroa hegoaldeko produktuz osatutako hiru saski jarri dituzte aukeran, baita Agertuz karta jokoa ere. Urriaren 24an hasi eta hilaren 14ra arte luzatuko da auzolan-ariketa erraldoi horretan Agerreko —alegia, Nafarroa erdi eta hegoaldeko— produktuz osatutako hiru saskiak eskatzeko kanpaina; horien balioaren %25 zonalde horretako euskalgintzari bideratuko zaio. “Ekin eta ekin, urteak dira jada Agerrean euskara sustraitzeko lurra landu eta iraultzeko lanetan gabiltzala. Auzolan erraldoi batean lantzen dugu lurra, euskaltzaleon arteko elkartasunez ematen diogu zolari behar duen eguzki, ur eta haizea”, azaldu dute Errigorako kideek
Nafarroako Agerren euskara hauspotzeko lanean dabiltzan eragileek denen ekarpena behar dutela azaldu dute iniziatibako kideek, baliabide ekonomikoz hornitzeko, baita haien “eguneroko batailetan” gainontzeko euskaltzaleen babesa eta arnasa sentitzeko ere. “Lurraldeak batuz indarrak biderkatzeko aldia da kanpaina, Nafarroa hegoalde eta erdialdeko euskalgintzari behar duen haize bolada bidaliko diogu denon artean puzka!”.
Saskien eta karta jokoaren eskaerak Errigoraren webgunearen bitartez egin behar dira. Eskaera horretan, saskiak non jaso zehaztu behar dute Errigorarekin bat egin dutenek. Hala, Oarsoaldean osotara hamabi tokitan jaso ahalko dira saski horiek. Beheko zerrendakoak dira. Aurrerago jakinaraziko dute tokian tokiko eragileek noiz jaso behar diren otarreak.
Errigorako saskiak. Oarsoaldeko jasotze puntuak.
Lezo
- Oroitzene AEK euskaltegian.
- Pasaia-Lezo Lizeoan.
Oiartzun
- ABB Niessen enpresan.
- Haurtzaro Ikastolan.
- Labore Oarson.
Errenteria-Orereta
- Arditurri elkartean.
- Orereta Ikastolaren Esmalteriako egoitzan.
- Lau Haizetara Euskaltzaleen Topagunearen egoitzan (Joxepa Antoni Aranberri anitzenean)
Pasaia
- San Pedroko Antxeta elkartean.
- Donibaneko Bixi Bixi elkartean.
- Antxoko Basari elkartean.
- Trintxerpeko Trintxer elkartean.
- Pasaia-Lezo Lizeoan.
- Oharra: Antxon, Txirrita AEKn, Jaizkibel elkartean eta Leunda prestatutako jakien saltokian ere eska daitezke saskiak.
