Elkartasunak ere badu leku Behobia-Donostian
Gabierrotako Auzo Elkarteak antolatuta, diru bilketa solidarioa egingo dute Aita Mariren alde igandean bertan, Behobia-Donostia lasterketa bitartean. Asteburu osorako, gainera, ekitaldiak antolatu dituzte migrazioaren gaineko gaiaz kontzientzia hartu eta sentsibilizazioa lantzeko herritarrekin.
Gabierrotako boluntario taldea aurreko ekitaldi bateko bilketan.
Olana urdin erraldoia zabalduko dute beste urtebetez Gabierrota auzoaren sarreran igandean. Helburua, Aita Mari erreskate ontziaren aldeko bilketa solidarioa egitea. 2019an hasi zen Errenteria-Oreretako Gabierrotako auzo elkartea elkartasun ekintza hori egiten, oso gogoan du Victor Gomez Vega antolatzaileak eta auzo elkarteko kideak: «Auzoa aktibatzeko ekintza bat antolatu nahi genuen, eta une horretan egunerokotasun betea zuen Aita Mari ontziak, denbora luzea zeramalako Pasaiako portuan Mediterraneo aldera irten ezinik». Hala hasi zuen auzoak elkartasun istorio ederra, eta ordutik hutsik egin gabe «esfortzu txiki bat gehiago» egitea eskatzen diete Behobia-Donostia lasterketan parte hartzen duten kirolariei, «euro bateko txanpona soinean eraman dezatela Gabierrotatik pasatzeko unean olana urdinera botatzeko».
Mediterraneoa irudikatzen du urtero Gabierrota auzoko boluntario talde horrek olana urdinarekin: migratzaileentzat, bizi hobe baterako bidean gehiegitan oztopo gaindiezin den itsasoa; Aita Mari ontziarentzat, elkartasun eskuzabalerako eremu gordina.
Antolaketan 44 lagun ari dira. Harro dio Gomezek eurena auzo solidarioa dela, «egunean bertan bizilagun pila aritzen dira laguntzen». Aurten, asteburu osora zabaldu dute programazioa, 2021ean egin zuten moduan: «Diru bilketatik harago, gaiaren gaineko kontzientziazioa egin nahi dugu, ezinbestekoa baita. Gabierrotak atera dezakeen dirua testimoniala da, eta indarra, gaiarekiko informazioa zabaltzen eta sentsibilizazio lana egiten jarriko dugu».
Horri begira gaur bertan (ostirala) hasiko da Evaristo Bouzas plazan muntatu duten karpa ekitaldiak hartzen.
Gastronomia eta musika eskutik
Gastronomia erakustaldi solidarioa antolatu dute gaurko. 20:00etan hasita jatekoak eta musika izango dira, Radio Rebelde taldea eta La Otra Kalleren eskutik. Gomezek eskertu egin du hori posible egingo duten guztien konpromisoa, «guztia dohaintzan egiten dugu; gozotegien, tabernen eta batez ere musika taldeen eskuzabaltasuna ikaragarria da».
Larunbatean, berriz, 11:00etan hasita Itsas Salbamenduko boluntarioak izango dira auzoan hitzaldia ematen eta kontzientziazioa lantzen. Batez ere, ikasleei begira antolatu dute ekintza hori, eta Oarsoaldeko ikastetxe guztietara bidali dute oharra, «gazte horiek dira etorkizuna». Kontzientziazio tailerra izango da. Arratsaldez, jubilatuen elkarteak antolatuta bingo solidarioa egingo dute 19:30etik aurrera, eta zuzenean ariko dira Calle Beat eta Psicoacustics taldeak.
Igandean gasolindegia zenaren aurrean postu bat, animaziorako musika eta olana urdinak jarriko dituzte, baita txosna nahiz Aita Mari-ren arropa salgai ere. Hori guztia Bixkor txarangak girotuko du.
Hiru egunetan, gainera, auzoan jarriko duten karpan Valentziara (Herrialde Katalanak) bidaltzeko materiala jasoko du auzo elkarteak.
Esker on hitzak izan ditu Gomezek elkartasun erakustaldia posible egiten duten guztientzat. Aipamena egin nahi izan dio, berezi-berezia, elkartasun sare horretan zein auzoaren martxan ezinbesteko kide izan duten Xabiri. «Gaur bertan abisatu didate hil dela —hilaren 1ean elkarrizketatu zuen Gomez hitza-k—. Oroitu nahi dugu, beti izan baita laguntzeko prest. Asteburu honetakoa berari ere eskaini nahi diogu».
