Umeek gerran dituzten bizipenak, arte lengoaiatik kontatuta
Kukai Dantzak eta Elkarrek 'Klera' argitaratu berri dute; erdi-erdian gerra egoera sufritzen duten umeen bizipenak.
Asteartean aurkeztuko dute 'Klera' argitalpena. Kukai Dantzak eta Elkar argitaletxeak Klera argitaratu berri dute. Dagoeneko liburu dendetan dagoen publikazioa eta Durangoko Azokan izango dena. Argia ikusi berri duen proiektuaren oinarrian, umeek gerran dituzten bizipenei erreparatu diete hainbat artistek, arte lengoaia ezberdinen bidez.
Hala, literatura, dantza, musika eta ikus-entzunezkoekin josi dute Klera argitalpen berezia ontzeko.
Datorren astearte goizean aurkeztuko dute prentsa aurrean Donostiako Victoria Eugenia antzokiko Klub aretoan argitalpena. Jon Maya dantzari eta Kukai Dantzaren zuzendaria izan da argitalpenaren zuzendari artistikoa eta Kukai Dantza arduratu da dantza arloaz. Ilustrazioa, June Sansebastian gazte oiartzuarrak egin du eta kolaboratzaileak Oarsoaldeko herrietako haurrak izan dira. Egile guztiek hartuko dutela parte aurkezpenean azaldu dute, eta materiala ikusteko aukera izango dela.
