Meipin bigarren igogailua instalatzen ari dira
Bordalaborda eta San Roke kaleak elkar komunikatuko ditu eta 2025eko apirilerako bukatuta egongo dira. Aurrekontua 594.247,54 eurokoa da.
Meipiko irisgarritasuna hobetze aldera, igogailu bat instalatu zuten pasa den martxoaren 25ean eta aste honetan bigarren igogailu bat instalatzeari ekin dio udalak. Bigarren faseari dagozkio lan hauek eta bigarren lotura bertikal bat ezarriko dute Bordalaborda eta San Roke kaleen artean.
Lan hauek aste honetan hasi dituzte eta hurrengo urteko apirilean burutzea espero dute. Obra hauen aurrekontua 594.247,54 eurokoa da eta Eusko Jaurlaritzak diru zorro horretara 277.657,04 euro bideratu ditu; gainontzekoa, berriz, udalak.
Lehenbiziko igogailuak jada “onura handiak” eman dituela jakinarazi du Aintzane Taberna Pasai Donibaneko alkateordeak. Bereziki goiko auzoetan bizi direnek Meipi “sekula baino gertuago” dutela orain nabarmendu du alkateordeak, eta bigarren fase honi “ilusio eta gogo handiarekin” ekin diotela azaldu du ere.
Lan hauekin “zerbitzu publiko duinak” eskainiko dituztela ziur da Iraitz Pazos, Hirigintza, Zerbitzu eta Mantentze lanen zinegotzia. Zehazki, kolektibo zaurgarrienen eta mugikortasun arazoak dituzten mesetan izango direla bi igogailuak adierazi du Pazosek.
Azkenik, agintaldi planean hartu zuten konpromisoarekin aurrera egiten ari direla azaldu du alkateordeak eta irisgarritasuna bermatzen segituko dutela berretsi du. “Oraindik lan handia dugu Pasaia herri irisgarria izan dadin, baina Meipiko bigarren igogailu hau eraikitzea aurrerapauso handia izango da” bukatu du.
