Gustuko tokian aldaparik ez
Hutsik ez du egin aurten ere Behobia-Donostia lasterketako Piratak. Lanbarren industriagune inguruan, bere espazioan, egin die harrera lasterkariei azken 31 urteetan bezala.
Behobia-Donostia lasterketa Lanbarren inguruan, Pirata bertan. Gustuko tokian aldaparik ez. Horrela erakutsi dute Behobia-Donostia lasterketan parte hartu duten 27.722 lasterkariek, eta arin bezain azkar igo dute Gaintxurizketako gaina. Bide bazterrean, animoak eman eta eman herritar andana; horietako asko-asko Lezo eta Oiartzundik hurbildutakoak. Ziur bihotzez eskertu dutela kirolariek jasotako animo horietako bakoitza, erregaia baitute lasterketa entzutetsua, hasi eta buka, gogotsu egiteko.
Hutsik ez du egin aurten ere Behobia-Donostia lasterketako Piratak. Lanbarren industriagune inguruan, bere espazioan, egin die harrera lasterkariei azken 31 urteetan bezala, musika ozen. Lasterka eta dantzan puntu horretan, denak. Eta gelditzen direnak, asko-asko omen dira eskuko telefonoarekin selfiea egitera Piratarekin.
Nabarmentzekoa emakumeen parte hartze datua: aurtengo lasterketan, 8.716 izan dira. Pozgarria, goraka doalako emakumeen parte hartzea Behobia-Donostia lasterketan ere, oraindik orain, bide luzea badago ere parekidetasunera heltzeko. Iragarpenak txarrak baziren ere, eguraldiak plan aldaketa egin eta goiz eguerdi giro bikaina eskaini die korrikalari eta ikusleei. Ondokoak Gaintxurizketa gainean, eta Lanbarren industria gune inguruan egindako argazkiak dira.
