Ijito Astearen barruan hainbat ekitaldi, ostiralera arte
Atzo hasita, ostiralera arte, pilota partidak, ipuin kontaketa, eta kaxoi flamenko tailerra antolatu dituzte Ijito Astearen barruan.
Ijito astearen aurkezpena atzo. Argazkia: Herri Bizia Atzotik hasita Ijito Kultur Astea egiten ari dira Errenteria-Oreretan. Ohikoa den ijito kafearekin zabaldu zuten astea atzo goizean, Zumardian. Agerraldi horretan, aste honetarako ondu duen egitarauaren berri eman zuen Kamelamos Adiquerar elkarteak, baina baita, asteak dituen helburuez hitz egin. Horien artean, behinena, “diskriminazioari” eta “ijitoen aurkako jarrerari” aurre egitea da elkartearentzat: “Ekitaldi bakoitza, urrats bat da kultur inklusiorako eta antigitanismoari aurre egiteko”.
Honakoa, 22 ekitaldia izango du Ijito Asteak: “Ijito komunitatearen eta Errenteriako herriaren arteko zubiak eraikitzearen aldeko apustua egin dugu, 1991z geroztik; izan ere, argi dugu kulturak zubiak eskaintzen dizkigula sareak sortzeko, ezagutzaren bidez”.
Ostiralera arte egingo dute Ijito Kultur Astea. Ijito kafearekin hasi zituzten atzo antolatutako ekitaldiak eta arratsaldean astearen klasiko bihurtu den Montxo Jimenez Esku Pilota Txapelketa abiatu zuten. Agustina Otaola pilotalekuan izango dira hurrengo partidak, bihar eta ostiralean 19:00etatik 21:00etara. EPLE eta Errenteria-Oreretako Mindara Elkartearen laguntza izango dute pilota txapelketa horretan.
Gaur, Isabel Jimenezek dinamizatutako ijito-ipuinez gozatu ahal izango dute haurrek Markolako ludotekan 18:00etan, eta ostegunean, kaxoi flamenkoaren inguruko tailerra izango da Beraungo gaztelekuan 18:00etan.
60 ijito familia udalerrian
Ijito komunitatea zenbat herritarrek osatzen duten jakitea zaila dela azaldu du Kamelamos Adiquerar elkarteak, “ez da egiten zentsu hori, eta kontuan hartu behar da Errumaniatik heldu eta ijitoak diren biztanleak badirela, baina errumaniar gisa hartzen dituzte aintzat. oso zaila da beraz kopuru zehatz bat ematea”. Hala ere, udalerrian, Kamelamos Adiquerar elkartearekin harremanetan diren 60 familia dituztela erantsi du, “gehiago dira ijito komunitateko kideak, baina ez dugu zenbaki zehatza, ez da erraza”.
