Indarkeria matxistari aurre egiteko prestatu da Pasaia
Egitarau zabala antolatu da Pasaian Emakumeen Aurkako Indarkeria Desagarrerazteko Nazioarteko Egunaren harria. Jarduera eta mobilizazioak egongo dira.
Azaroaren 25eko Emakumeen Aurkako Indarkeria Desagerrarazteko Nazioarteko Egunagatik gaur, hilaren 13an, hasi eta abenduaren 4an bukatuko den egitaraua osatu dute Pasaian. Udalak mobilizazioetan eta antolatutako jardueretan parte hartzera gonbidatu ditu herritarrak.
Gaur arratsaldean irekiko da egitaraua, 17:00etan Trintxerpeko Alkateordetzan antolatutako mahai-inguruarekin. Giza eskubideen nazioarteko hiru defendatzailek hartuko dute parte, Las Mélidas mugimenduko Amaranta Margarita Portillo Peña (El Salvador), Giza Eskubideen Defendatzaileen Sare Nazionaleko Diana Carolina Maradiaga Amador (Honduras) eta Yussi ekintzaile palestinarrak. Mahai-inguruak aukera emango die herritarrei gonbidatuen proiektuak ezagutu eta aurre egin beharreko erronka eta zailtasunak ulertzeko, baita bertako elkarte eta mugimendu feministarekin elkarrizketa sortzeko ere. Mahai-ingurua gazteleraz izango da, eta Udalak gonbidatuen segurtasuna bermatzeko neurriak hartuko dituela adierazi du.
Hurrengo hitzordua hilaren 19an Donibanen izango da. Indarkeria matxista, bikotearen eskematik haratago : familia barruko indarkeria izenpean matxismoaren errealitatearekiko dagoen ikuspegia zabaldu, matxismoarekiko kontzientzia hartu eta bestelako indarkeria motak detektatu eta lagundu ahal izateko tresnak emango dituzte hitzaldian. Donibaneko Kulturguneko Topagune aretoan izango da hitzaldia hilaren 19an 18:00an. Tailerra euskaraz eskainiko da.
Bi egunetan eskainiko dute A25 : Ez gaituzte isilduko tailerra, hilaren 20an eta 27an. Jabetze Eskolaren baitako tailerra da, eta indarkeria matxistaren aurkako lelo, esaldi eta abestiak bildu, eguneratu eta asmatu beharko dituzte parte-hartzaileek. Jarduera elebiduna izango da, eta San Pedroko Alkateordetzan egingo dute. Lehentasuna edukiko dute Jabetze Eskolaren bidez izena ematen duten emakumeek.
Hilaren 22an jarraituko du egitarauak Bekoz Beko elkartearen hitzaldiaren eskutik. Nerabezaroa, gazteria eta indarkeria matxista hitzaldia antolatu dute Antxoko Elokaldetodas-en 18:30etan, gateleraz. Ondotik, Gipuzkoa Feminista elkarteak indarkeria matxistaren biktimei omenaldia egingo die 20:30etan Trintxerpeko Gernika plazan.
Ohi bezala, hilaren 24an 12:30etan Ni una menos errezitaldi poetiko-musikatua antolatu du Arteliburu 21-ek Topaketaren laguntzarekin. Gazteleraz egingo da errezitaldia, Trintxerpeko Alkateordetzan.
Emakumeen Aurkako Indarkeria Desagerrarazteko Nazioarteko Egunerako, hilaren 25erako, hiru mobilizazio antolatu ditu mugimendu feministak. Donibanen 19:00etan hil-kanpaiak jo eta auto-karabana antolatu dute, Antxon, Bekoz Bekok elkarretaratzea antolatu 19:30etan Biteri plazan, eta azkenik, Trintxerpen ere elkarretaratzera deitu du Pasaiako mugimendu feministak 19:30etan Gernika plazan.
Egitarauari itxiera emateko abenduaren 4an 17:00etan Trintxerpeko Alkateordetzan Generoa, arraza eta klasea : ikuspegi dekoloniala emakumeen aurkako indarkeriaren adierazpenean saioa antolatu dute Kultur Arteko Elkarrizketak ekimenaren baitan. Saioa gazteleraz izango da
