Nazioarteko aktibista feministekin bildu dira Pasaian
Giza eskubideen defendatzaile diren hiru aktibista feministarekin jardunaldia egin zuten atzo, hilaren 13an. Emakumeen alde egiten duten lana aurkeztu zuten.
El Salvadorreko Amaranta Margarita Portillo Peña, Honduraseko Diana Carolina Madariaga Amador eta bere identitateatea babesteko Yussi izena erabili duen Palestinako aktibistei harrera egin zien atzo, hilaren 13an, Pasaiako Udalak.
Udaleko talde politiko guztiek hartu zuten parte udaletxean egindako harreran. Bertan, udal-ordezkariek aktibistek emakumeen eskubideen alde eta haien herrialdeetako beste komunitate ahulen alde egiten duten lana ezagutu ahal izan zuten.
Udal-ordezkariez gain, hiru gonbidatuek Herri Babesareko eta elkarte feministetako ordezkariekin egoteko aukera izan zuten, Donibaneko Bixi-Bixiren lokalean egindako bazkarian. Bizipenak trukatu eta tokiko eta nazioarteko erronkak partekatu zituzten. Antxoko Bekoz Beko elkarte feministaren lokalean Pasaian emakumeen eskubideen alde egiten den lana ezagutu zuten aktibistek.
Jardunaldiak bukatzeko, Trintxerpeko Alkateordetzan, Emakumeak, giza eskubideak eta emakumeen eskubideak defendatzen izeneko mahai-inguruan parte hartu zuten gonbidatuek.
Herri Babesarea eta Mundubat Fundazioarekin lankidetzan antolatu dute hiru herrialdeetako aktibisten jardunaldi hau, eta lankidetza estutzen jarraituko duela adierazi du Pasaiako Udalak. Babes eta elkartasun sareen eta giza eskubideen defendatzaileei laguntza ematearen garrantzia azpimarratu du Teo Alberro Pasaiako alkateak.
Pasaiak Indarkeria Matxistaren Kontrako Nazioarteko Egunaren harira prestatu duen egitarauaren barruan antolatu zen jardunaldia. Abenduaren 4ra arte beste hainbat jarduera eta mobilizazio antolatu dituzte herriko eragileek.
