Arditurriko eta Karrikako bidegorriak lotuko dituzte Altzibarren
Herriko hainbat txoko sarearekin lotu eta adarreko joan etorriak erraztu nahi ditu udalak. Aparkaleku berriak ere egingo dituzte.
Herri barruko mugikortasunerako baliabide estrategikotzat hartzen du udalak bidegorria; ondorioz, herriko hainbat txoko sarearekin lotu eta adarren arteko joan etorriak erraztu nahi ditu. “Oiartzungo ardatz aktibo garrantzitsuenaren erabilera areagotzeko eta oinezko eta bizikleten segurtasuna hobetzeko” asmoarekin, Arditurriko bidegorria Karrikara egindako adarrekin lotzeko lanak hasi dituzte.
Karrikatik datorren zatiak Altzibarko Done Petri eta Olalde kaleen arteko bidegurutzean zuen bukaera orain arte, eta espaloitik egin behar izaten zirela dio udalak Arditurriko bidegorria bitarteko metroak. Martxan jarri duten proiektuarekin bi zatiak elkartuko dituzte, Klarene plazako berdegunetik bide zati berria eginda. Zehazki, Martintxo kaleko zubitik hasi eta erreka ondotik joango da bidegorria, Olako zubira arte.
Aparkaleku berriak ere bai
Bi bidegorriak konektatzeko lanekin batera, Klarene plazako aparkalekua berrantolatuko dute. Ibaitik gertuen dauden plazak kenduko dituzte bidegorria egiteko, eta belardiaren zati batean toki berriak sortuko dituztela ohartarazi dute. Ondorioz, autoentzako 26 aparkaleku berri eta motoentzako bi gune egingo dituzte. Auzoko erdigunean auto gutxiago ibiltzea lortu nahi dute horrela, ondoan aparkatzeko aukera zabalduz.
Hots, argiterian ere hobekuntzak egingo dituzte: inguruko luminaria aldatu, farola berriak jarri eta airetik pasatzen diren hainbat linea elektriko lurperatuko dituzte.
174.000 euroko aurrekontua izango du proiektuak , eta dagoeneko hasi dituzte lanak. Abenduan bukatzea aurreikusi dute.
