Emaus Gizarte Fundazioak eta Koopera Ingurumen Zerbitzuak indarrak batu dituzte
Gipuzkoan kudeatzen dituzten hondakinak modu bateratuan tratatzeko eta laneratzen ari diren langileak lan merkatura sartzen laguntzeko ABEE bat sortu dute.
Emaus Gizarte Fundazioa eta Koopera Ingurumen Zerbitzuak irabazi asmorik gabeko bi erakunde dira, eta 2024ko urtarrilean Gipuzkoan kudeatzen dituzten hondakinak modu bateratuan tratatzeko eta laneratzen ari diren langileak lan merkatura sartzen laguntzeko ABEE bat eratu zuten -aldi baterako enpresa elkartea-. Akordio horri esker, Errenterian eta Urnietan dituzten lantegietan hondakinen kudeaketa automatizatuagoa egiteko aukera izan dute.
Urnietako instalazioan 280 tonatik gora gailu elektriko eta elektroniko kudeatzen dituzte: gailu handien kasuan berrerabilpen tasa %10ekoa da, eta gailu txikien kasuan %40koa. Lan karga horri aurre egiteko 7 lanpostu berri sortu dituztela azaldu dute enpresek: lau hondakinen bilketan eta hiru berrerabilpen prozesuetan.
Bestetik, tamaina handiko hondakinei dagokienez, urtean 300 tonatik gora kudeatzen dituzte eta berrerabilpen tasa %60ra iristen da. Kasu honetan, hiru lanpostu berri sortu dituzte. Gainera, ehunak sailkatzeko iraulgailudun uhal garraiatzaile bat erosi dute eta prozesuak eraginkorragoak egiteko asmoz, garbigailuen diagnostikoa hasi dute.
Errenteriako instalazioetan, berriz, kontsumo osteko ehungintzaren kudeaketa integrala egiten duen plantan 2.000 tona kudeatzera irits daitezkeela adierazi dute eta horiek zabortegira hel ez daitezen lan egiten dute. Horretarako, jantziak moda iraunkorreko dendetara bideratzen dituzte. Gipuzkoan halako 10 dendekin lan egiten dute.
Bi elkarteek klima aldaketaren erronkari aurre egiteko konpromiso irmoa dute, eta Gipuzkoan erronka horri heldu beharko litzaiokeela aldarrikatu dute. Zentzu horretan, “inor atzean utziko ez duten soluzio berritzaileak” bilatu behar direla esan dute eta horretarako, herrialdea hondakinen kudeaketa espezializatutako azpiegituraz hornitzea funtsezkoa dela.
