Aldundia: "Indarkeria sexistarik gabeko kaleak, auzoak eta udalerriak nahi ditugu"
Irmo salatu du Gipuzkoako Foru Aldundiak atzoko Trintxerpeko hilketa saiakera matxista. Bat egin du udalak deitutako mobilizazioarekin.
Irmo, gogor salatu du Gipuzkoako Foru Aldundiak atzo eguerdian Trintxerpen izan zen hilketa matxista saiakera. “Berriz ere adierazi nahi dugu indarkeria matxistarik gabeko kaleak, auzoak eta udalerriak nahi ditugula”, adierazi du erakunde adierazpenean. Biktimari gertutasun eta elkartasuna adierazi dio foru erakundeak.
Erasoari arbuio publikoa adierazteko mobilizazioekin bat egin du aldundiak. Horien artetik lehena gaur (astelehena) eguerdian izan da, udaletxearen parean. Nerea Isasi Berdintasuneko foru zuzendaria izan da han aldundiaren izenean. “Horrelako gertakarien jatorria da gizonen eta emakumeen arteko berdintasun falta, emakumeak mendean eta kontrolpean izatea nahi dituzten jarrera eta ideia matxistak”, nabarmendu dute aldunditik
Pertsonen duintasuna bermatzea, sexu askatasuna eta osotasun fisikoa errespetatzea, eta gizonen eta emakumeen arteko berdintasuna praktikara eramatea “eskubide bortxaezinak” dira aldundiaren ustez, “eskubide horien aurka egiten duten jokabideek ez dute lekurik gure gizartean”.
