Beñat Gaztelumendi, Oiartzundik finalera
Gipuzkoako Bertso Txapelketaren lehen finalerdian añorgarra izan zen irabazle, Ane Labakaren aurretik. Bete egin zen Elorsoro.
Beñat Gaztelumendi, atzo Oiartzunen. Azken fasean da Gipuzkoako Bertsolari Txapelketa. Oiartzunen jokatu zen atzo (igandea) hiru finalerdietatik lehena, eta neurri batean pronostikoak bete egin ziren: Beñat Gaztelumendi Arandia añorgarra izan zen atzokoan Elorsoron puntu gehien lortu zituen bertsolaria, beraz, saioa irabazi eta zuzenean abenduaren 14an Donostiako Illunben egingo den finalean izateko eskubidea bere egin du. Ane Labaka Mayoz lasartearra hurbil izan zuen Gaztelumendik, ordea: irabazleak 560,5 puntu eskuratu zituen atzokoan, eta bigarren izan zen Labakak 552.
Bete egin zen atzo Elorsoro. Ikusmina eragin zuen herrialdeko bertsolarien txapelketaren finalerdiak. Gozatu egin zuten ikusleek, bertsolariek lehiaketak eskatzen duen tentsio puntua izan arren, zenbaitetan aske aritzeko aukera ez zutelako galdu. Eskertu egin zuen publikoak hori.
Gaztelumendiren eta Labakaren atzetik, hirugarren Nerea Elustondo Plazaola izan zen, 522,5 punturekin. Haien ondoren Asier Azpiroz Iztuetak (475,5 puntu), Oier Etxeberria Zubimendik (468,5) eta Eli Pagola Apezetxeak (449) osatu zuten sailkapena.
Gipuzkoakoaren hiru finalerdietatik lehena izan zen Oiartzungoa. Beste biak hilaren 24an Zarautzen (17:00) eta abenduaren 1ean Arrasaten (17:00) izango dira. Zarauzkoan izango da Alaia Martin Etxebeste oiartzuarra.
Ondokoak Elorsoroko saioaren hainbat irudi dira, Gipuzkoako Bertsozale Elkarteak egindakoak. Irudi gehiago ikusteko, eta finalaurrekoaren xehetasun gehiago izateko baliatu esteka hau.
