Berdintasun Kontseilua osatzeko bidean dira Lezon
Urrian egin zuten lehen bilera udalak eta herriko eragileek. Urtarrileko batzarrean hasiko dira mahaiaren egitekoaz eta izaeraz hausnartzen.
Urriko bilkuraren une bat. Lezoko eragile feministen, emakume taldeen eta alderdi politikoen aspaldiko eskaera da herriko eragileen nahiz norbanakoen eta udalaren ekimenez herrian berdintasun neurriak ezarri eta horren gaineko erabakiak bideratzeko. Erantzuna izan du horrek. Hainbat hilabeteko aurre-lanketaren ondoren, Berdintasun Kontseilua sortzeko bideari ekin diote udalak eta Lezoko eragileek. Bide horretan urrats esanguratsua egin zuten urri bukaeran, kontseilua eratzeko lehen bilera egin zutelako Kultura Aretoan. Hurrengoa urtarrilaren 22rako deitu dute.
Hamazazpi lagun bildu ziren urriaren bukaerako topagunean, gazte-gaztetatik hasi eta adinekoetara. Udalaren partetik Eneritz Arruti Osanbela eta Mireia Kuesta Unzain Berdintasun zinegotziak izan ziren. Haien alboan eragileetako ordezkariak: Gaxuxa, Lezdi, Etxetxo, Allerru, Piztu Lezo, Ttakun edo Iruntzenekoak. Batzarrean aurrekari bat izan zuten abiapuntu, Errenteria-Oreretako adibidea: hango udaleko Berdintasun zinegotzi Itsaso Cruz Etxeberriak herri mugakidean egindakoen berri eman zuen, tartean Berdintasun Saila abiatzea, Eskola Feministak, Emakumeen Etxea edo Errenteriako III. Berdintasun Plana. Emakumeen ahalduntzeaz, emakume taldeei eta eragile feministei egindako aitortza, eta azken horien saretzea nahiz udal politiketan eragitea ere izan zituen hizpide Cruzek.
Urtarrilaren 22koan herrira jaitsiko dute gogoeta. Hau da, Lezon sortzekoa den kontseiluaren nondik norakoak eztabaidatzeko eta bilgunearen izaera adosteko aroa hasiko dute.
