Eresbili eta Jon Baguesi aitortza, EMKEren Santa Zezilia kontzertuan
Eresbilek mende erdia bete du Euskal Herriko konpositoreen dokumentazio musikala bildu, katalogatu eta zabaltzen; Baguesek musikarekin lotuta bizi osoko ibilbidea du soinean. Ostiralean —hilak 20— izango da kontzertua, Fatima Andra Mariaren elizan.
San Inazio kontzertuko irudi bat. Argazkia: Emke Bi handi omenduko ditu EMKEk ostiralean Santa Zezilia egunaren harira egingo duen kontzertuarekin. Erakundea da lehena, Eresbil, eta mende erdia bete du aurten Euskal Herriko konpositoreen dokumentazio musikala biltzen, katalogatzen eta zabaltzen Errenteria-Oreretan duen egoitzatik. Norbanakoa da bigarrena, oso handia ere, bere bizi ibilbidean egin duen lana bezain handi: Jon Bagues Erriondo. Azken hori aitortu nahi dio musika bandak, urte luze-luzez kultura eta zehazki musikaren alde egin duen ibilbide oparoa. Tartean, Eresbil barruan egin du lan eskerga hori.
“Harrotasuna” azaldu du EMKEk, harentzako Eresbil eta Bagues omentzea garrantzitsua delako: “EMKEn sinistuta gaude bere kulturan sustraituta dagoela herri baten izaera, eta kontzertu honen bidez norbera bere esparrutik kultura hori eraikitzen lagundu duten bi eragile garrantzitsu omenduko ditugu”.
Aitor Mitxelena Rubio izango da kontzertuaren zuzendari artistikoa, eta Curt Mahr konpositore alemaniarraren Alleweil Lustig Polka obrarekin zabalduko duen kontzertu programa eklektikoa prestatu du. Leonard Bernsteinen Overture to Candide, Leroy Andersonen The Tipewriter, Jose Pablo Moncayoren Huapango, Pietro Mascagniren Intermezzo de Cavalleria Rusticana, edo Benito Lertxundiren Baldorba interpretatuko dituzte emanaldian. Emanaldiak ez omen du inor epel utziko; hala esan dute antolatzaileek.
Musikarien moldaerraztasuna
Errenteriako Musika Kultur Elkartea musika banda osatzen duten musikariez ere mintzo da. Horien moldaerraztasuna eta egokitzeko gaitasunak eman diola musika bandari kontzertu programei eta proposamen eszeniko ezberdinei erantzuteko aukera nabarmen jarri du elkarteak.
Ostiralekoa berezia izango da, EMKEk antolatutako kontzertu denen antzera. Musikaririk gabe ez da; baina ikus-entzuleak ere ezinbestekoak ditu. Azken horiei egin die deia bukatzeko, ostiraleko emanaldira bertaratu daitezen, eta omenaldia jasoko duten Eresbil eta Jon Bagues Erriondori “merezi duten txalo zaparrada eskaini diezaieten”.
Kontzertua doakoa da.
