Mari Domingik Añabitarte Baserrian hartuko du ostatu
Mari Domingiren Errepublika Magikoaren hirugarren ekitaldia antolatu du Orereta Ikastolak abenduaren 6tik 22ra.
Mari Domingieren Errepublika Magikoak zabalik izango ditu ateak abenduaren 6tik 22ra. Argazkia: Orereta Ikastola Errepublika magikoa bihurtuko da, hirugarrenez, Añabirate eremua, eta Mari Domingi izango da errepublika berezi horren gidari. Orereta Ikastolak antolatutako iniziatibak Euskal Herriko tradizioak eta egungo jendartearen izaera, desio nahiz erronkak uztartu ditu esperientzia “magiko” batean. Añabitarte Baserria —Zamalbide auzoa 14— Mari Domingiren etxe bihurtuko da horretarako, abenduaren 6tik 22ra arte, eta haren inguruko zelaiguneak xarmaz, iratxoz eta baratzezainez beteko dira.
Ibilbidea antolatu dute aurten ere aurreko bi ekitaldietan bezala, Añabitarteko historia eta istorioak kontatuko dituena. 45 minutu inguruko ibilbide horretan Mari Domingiren etxea bisitatu, harekin berriketan aritu, gutuna eman eta salda bero bat hartzeko aukera ere izango dute. Mari Domingiren laguntzaile, galtzagorri bihurri bezain jatorrak ere bertan izango dira. Orereta Ikastolak azaldu duenez, Olentzero ez da bertan izango: “Mari Domingik mendian urrun duen bizilekua aldi baterako utzi eta herritik gertuago dagoen etxe baten beharra duela adierazi dio Orereta Ikastolari, eta Añabitarte Baserria eskaini diogu aste batzuetarako. Olentzerok badu berea eta han egongo da bera”.
Abenduaren 6tik 22ra izango da zabalik Mari Domingiren errepublika Magikoa bertaratu nahi duen orori begira, asteburu eta jai egunetan. Bisitan joateko, sarrera erosi eta hitzordua hartu behar da lehenik (klik hemen). Sarrerak, 8 euroan dira salgai. Azken sarrerak gelditzen direla salgai jakinarazi du Orereta Ikastolak.
Mari Domingiren errepublika magikoan emakumea eta natura dira ardatz. Hala aldarrikatu du Orereta Ikastolak: “Olentzeroren ostean heldu da gurera Mari Domingi, eta haren itzalpean heldu da: haren emazte, laguntzaile edo lagun gisa. Olentzero behar izan du existitzeko”. Bide horretan urratsa aurrera egin eta Mari Domingiri izaera propioa eman nahi diola azaldu du Orereta Ikastolak, “nahi duen bezala existitzeko, genero eta familia eredu jakinei lotu gabe”.
Eguberrien izaera paganoan eta ospakizunak naturaren zikloekin duen harremanean ere jarri du azpimarra Orereta Ikastolak, “egiteko asko dagoenaren jakitun, bide horri ekarpena egin nahi dio Orereta Ikastolak iniziatiba honekin”.
