Material ortoprotesikoa biltzen jarraitzen du elkargo sozialistak
Jesusen Bihotza zaharren egoitzan bilketa egin zuten lehenik, baita Seminarioan ere, eta orain, Sanmarkosene adinekoen egoitzak eman die materiala dohaintzan
Material ortoprotesikoa biltzen jarraitzen du elkargo sozialistak, banku bat sortzeko. Argazkia: PSE-EE Material ortopedikoa eta ortoprotesikoa jasotzen jarraitzen du Errenteriako elkargo sozialista. Elkarlana abiatu zuen horrek ANDADE Espainiako Estatuko Anputatuen Elkarterekin. Irabazi asmorik gabeko bi eragile horien helburua, inklusioaren alde eta aniztasun funtzionala duten pertsonak ikusgai egitea dela esan du Jose Angel Rodriguezek, Errenteriako sozialisten idazkari orokorrak.
Jasotzen ari diren erantzunarekin pozik, Rodriguez, “protesi bankua indartzen ari gara erakunde publiko, pribatu eta bizilagunen kolaborazioa esker”
Manuel Quesada errenteriarra eta ANDADE elkarteko ordezkariak azaldu duenez, jasotako material ortopediko eta ortoprotesikoa teknikari profesionalek ikuskatzen ari direla, “beharra duten pertsonek erabiltzeko moduan egon dadin, baita garapen bidean, gerra egoeran edota hondamendiak gertatzen diren herrialdeetara bideratzeko”. Etiopiara material ortoprotesikoa duen edukiontzia bidali dutela jakinarazi du, halaber, eta bigarren bidalketa prestatzen ari direla.
Jesusen Bihotza zaharren egoitzan bilketa egin zuten lehenik, baita Seminarioan ere, eta orain, Sanmarkosene adinekoen egoitzak eman die materiala dohaintzan: “Gureaken laguntza izan dugu orain baita Iruko taldearena ere. Posible egin dute dohaintzan emandako material hori birziklatu eta behar duenaren eskura jartzea”.
Jasotzen ari direnak, honakoak dira: gurpildun aulkiak, makuluak, taka-takak, beso, oin, hanka, esku… Halakoak izan eta erabili edo behar ez dituztenei herriko etxera eramateko eskatu diete —Morrongileta kalea, 12 behea— erabilera berri bat eman ahal izateko. Telefono zenbaki bat ere jarri dute, informazio gehiago jaso nahi dutenentzat: 943 51 99 99.
