Trintxerpeko eraso matxistari arbuioa udaletxearen atarian
Pasaiako Udalak deituta, atzoko eraso matxistari aurre egiteko elkarretaratzea egin dute eguerdian udaletxearen parean.
Atzoko Trintxerpeko eraso matxistari erantzuna eman diote gaur goizean udaletxearen atarian. Kaleko lehena izan da, Pasaiako Udalak deitutakoa; bigarrena arratsaldean egingo dute, 19:30ean, Trintxerpeko Serafin Esnaola plazan Pasaiako Mugimendu Feministak deituta. Goizeko erantzun eta gaitzespen mobilizazioan, besteak beste, udalean ordezkaritza duten alderdi politiko guztietako ordezkariak, udal langileak, aldundiaren ordezkariak (Nerea Isasi Berdintasun foru zuzendaria buru) nahiz Emakundekoak (Miren Elgarresta zuzendaria) izan dira. Teo Alberro alkatea eta Laura Ré Berdintasun zinegotzia arduratu dira erakunde adierazpena irakurtzeaz: “Gertakari honek berriz ere agerian utzi du jendarte parekidea eraikitzeko gizonen eta emakumeen arteko botere harremanak gainditu egin behar direla”, esan dute.
Udala indarkeria matxistaren kontra dagoela irmo azaldu dute bertan izan direnek, eta atzoko Trintxerpeko erasoak ez dituztela ez Pasaian ez inon onartuko, “herritarrok lanean jarraituko dugu emakumeok indarkeria matxistarik gabe bizi gaitezen”. Biktimari eta haren ingurukoei elkartasuna eta babesa adierazi dizkiete, eta zehaztu dute udalak biktimaren eskura jarriko dituela beharrezkoak dituen baliabideak.
Egiturazko arazoa. Horrela izendatu du udalak erakunde adierazpenean bortizkeria matxista. Botere harremanak iraultzeko zereginean, erakundeek “ardura berezia” dutela adierazi dute hitza hartu dutenek: “Pasaiako Udalak konpromisoa hartua du berdintasun politikak garatzen jarraitzeko eta Berdintasun Mahaiarekin elkarlanean aritzeko, gure bizikidetza oinarrien aurka doan gizarte arazo bati erantzuna emateko”. Udalak arratsaldeko mobilizazioarekin bat egiteko deia egin die pasaitarrei.
