Greba hasi dute Sanmarkoseneko langileek
Kaleratzeak ekidin eta langile guztiek %100 jardunaldi kontratuak izatea da langileen eskaera.
GReba hasi dute sanmarkosene egoitzan. Greba hasi dute Sanmarkosene adinekoen egoitzan, astebetez protestak egiten izan ostean. ELA, LAB eta ESK sindikatuek jakinarazi dute, erantzun zabala izaten ari dela greba hori; atzo hasi zuten. Langileak kaleratzeak bertan behera utzi eta plantilla osoak %100eko jardunaldi kontratuak izatea eskatzen ari dira protesten bidez.
Aste honetan hiru greba egun deitu dituzte, baina enpresak langileen eskaerei muzin eginez gero, greba mugagabea hasiko dute datorren astelehenetik aurrera —hilak 25—.
Gureak enpresak kudeatzen du Sanmarkosene egoitza baina plazen %96 Diputazioarekin kontzertatua dute. Pasa den irailean enpresak lan ordutegi eta egutegi proposamen bat medio, lan baldintzen aldaketa nabarmena proposatu ziela gogorarazi dute langileek: “18 langileei euren lanaldian murrizketa ezartzeaz gain, bost langileren kaleratzea jasotzen zuen. Langileen %36ak borondatezkoak ez diren lanaldi partzialak dituzte, eta egutegietan duten malgutasunak eta erabateko disponibilitateak lan baldintza kaxkarrak eragiten dizkie”.
Enpresak kontsulta epe ondorengo azken informa aurkeztu zien langileei ostiralean, eta ez du bertan langileen eskaera bat bera ere jaso. Hori horrela, langile guztiak %100eko kontratuak izan ditzatela, bost kaleratzeak ekidin ditzatela, eta egutegia adostua izatea aldarrikatzen jarraituko dute.
Joan den astean mobilizazioak hasi zituzten langileek egoera salatu eta konponbidea eskatzeko, eta aste honetan ere hala jarraituko dute hiru eguneko greba egitearekin batera, manifestazioak egingo dituzte bihar eta ostiralean, eta auto karabanak gaur eta ostegunean.
