Programazio zabala ondu dute euskara goratzeko
Errenteriako Udalak eta herriko eragileek Euskararen Eguneko egitarau bateratua antolatu dute, elkarlanean. 'Errenterian ari gara' lelopean, proposamen askotariko egitaraua osatu dute.
Euskararen Eguna gainean da, eta Errenteriako Udalak eta herriko hainbat eragilek egitarau bateratua antolatu dute, elkarlanean. Errenterian ari gara lelopean, ondu duten egitaraua anitza eta zabala da, proposamen askotarikoa, eta gaur aurkeztu dituzte xehetasun guztiak Leire Mazizior Udal Hizkuntza Politikako zinegotziak eta herriko eragileek. Antolatutako jarduerekin Errenteria-Orereta arigune dela erakutsi nahi dute, euskaraz bizitzeko aukera zabalak eskaintzen dituen herria baita.
Euskararen Egunaren bueltako jarduerak larunbat honetan (hilak 23) hasiko dira Etorkizuna irudikatzeko saioa izeneko bertso saioarekin. 19:00etan hasiko da, Joxepa Antoni Aranberri anitzenea eraikinean. Programazioa azaroan eta abenduan zehar gauzatuko da, eta adin tarte guztietako herritarrek aurkituko dute beren gustuko ekitaldiren bat. Horietatik hiru nabarmendu ditu Leire Maziziorrek.
Alde batetik, hilaren 24ko (igandea) kirol ginkana goratu du. Kirol jarduera hori aurtengo egitarauko berritasunetako bat da, eta bere helburua da aisialdi euskalduna eskaintzea eta euskaraz ondo pasatzea. Maziziorrek adierazi du udalak kirol eragileak inplikatu nahi zituela programazioan, eta kirol klubek udal erakundeak jaurtitako erronka onartu zutela zehaztu du hautetsiak. Orotara, 30 gazte talde baino gehiagok hartuko dute parte ginakanan, eta 150-200 gazte inguru espero dira. Jolasak herriko 8 plazatan gauzatuko dira, eta Gernika plazan hasiko dira, 10:00etan.
Bestalde, Xare izeneko ekitaldia nabarmendu du Maziziorrek. Saio horrek euskarazko kultura digitala sustatzeko xedea du, eta aurtengo beste berritasunetako bat da. Batxilergoko ikasleei begirako egitasmoa da, eta hilaren 28an egingo da, Lekuona Fabrikan. Azkenik, hilaren 30eko herri bazkarian jarri du arreta. Merkatuzarren egingo da, eta tiketak salgai daude 18 euroan Arkaitza, Landare eta Lekuzarra tabernetan, AEK euskaltegian eta Lau Haizetaran. Udal hautetsiak herritarrak animatu ditu bazkarian eta gainontzeko jardueretan parte hartzera.
Maziziorrek eskerrak eman dizkie eragile guztiei programazioa ontzeko egin duten lanarengatik eta izan duten inplikazioagatik. Kirol elkarteez gain, udalak honako eragileak izan ditu bidelagun: Lau Haizetara, Xenpelar Bertso Eskola, AEK, Kantujira, Badalab, Oarsoaldeko Euskara Batzordea, Talaios koop, Niessen elkartea eta SOS Arrazakeria. Horrez gain, udaleko hainbat departamentu ere aritu dira egitarauaren osaeran: Udal Hizkuntza Politika, Udal Euskaltegia, Herri Arte Eskola, Artxibategia, Kultura eta Liburutegia.
2024ko Euskararen Eguna
Hilak 23
- Bertso saioa: Etorkizuna irudikatzeko saioa, 19:00etan, Joxepa Antoni Aranberri anitzenea eraikinean.
Hilak 24
- Kirol ginkana: 10:00etatik 13:00etara, Gernika plazatik abiatuta. Herriko kirol elkarteek antolatu dute.
- Santa Xixili eguneko ospakizuna: 12:30ean, udaletxeko arkupeetan. Bertso Eskolako kideak, txistulariak eta Herri Arte Eskolako ikasleak ariko dira.
- Antzerkia: Metrokoadroka konpainiaren Artxibo biluzia antzezlana, 19:00etan, Niessen Kulturgunean. Sarrerak esteka honetan.
Hilak 27
- Hitzaldia: Interneteko eduki kontsumoa euskaraz, 19:00etan, Torrekuan. Talaiosek antolatuta, sarean euskaraz nabigatzen ikasteko saio bat da.
Hilak 28
- Xare ekitaldia: Batxilergoko ikasleentzat, Lekuona Fabrikan. Euskarazko kultura digitala sustatzeko egitasmoa da.
- Mintzodromoa: Errenteriako Udal Euskaltegiko eta AEK-ko ikasleak arituko dira Merkatuzarren, 09:30etik 12:00etara.
Hilak 29
- Antzerkia: Lankuren Teilatupean antzezlana, 18:00etan, Niessen Kulturgunean. Sarrerak esteka honetan.
- Jolasak: Euskarak batzen gaitu, 18:00etatik 20:00etara. Udal gaztelekuek eta Kuadrillategi programak antolatu dute.
Hilak 30
- Herri bazkaria: Merkatuzarren. Lau Haizetara Euskaldunon Elkarteak antolatu du. Tiketak salgai 18 euroan Arkaitza, Landare eta Lekuzarra tabernetan, AEK euskaltegian eta Lau Haizetaran.
Abenduak 1
- Kantaldia: 12:00etan, Herriko Plazan, Kantujira eta udal txistulariekin.
Abenduak 3
- Antzerkia: Kanpora sartzen antzezlana, euskaltegietako ikasleentzat. Gonbidapenak esteka honetan.
- Jolasak: 17:30etik 19:30era, Familiak euskaraz jolastu jarduera, ludoteketako 6-12 urte bitarteko gazte eta haien familiei begirakoa.
Abenduak 4
- 32. Bilduma aldizkariaren aurkezpena: Errenteria-Oreretako LGTBI+ memoriaren ingurukoa, 18:30etik 20:00etara, Joxepa Antoni Aranberri anitzenean.
- Emanaldia: Trikitilariak, dultzaineroak eta bestelako musikari, dantzari eta kantariak ariko dira.
Abenduak 14
- Ipuin kontaketa familian: 11:30ean, Lekuona Fabrikan.
- Kontzertua: Bulego, 20:00etan, Lekuona Fabrikan. Sarrerak agortuta.
