PSE-EEk kudeaketa “kaotikoa” egotzi dio gobernu taldeari aurrekontuen onarpen prozesuan
Aurrekontuaren gainean hainbat galdera zuzendu dizkiotela Ogasun zinegotziari eta hark ez duela erantzun salatu dute sozialistek.
Isaac Palencia eta Almudena de la Torre PSE-EEko kideak. Aurrekontuak onartzeko prozesuan kudeaketa “kaotikoa” izatea leporatu dio alderdi sozialistak gobernu taldeari. Horrela adierazi du komunikabideetara bidalitako prentsa ohar baten bidez, eta horretan salatu du hilaren 6an Ogasun zinegotziari hainbat galdera helarazi zizkiotela, baina ez dutela gaur-gaurkoz erantzunik jaso.
Erantzun ez izana udal kudeaketaren “antolaketa faltaren” adibidetzat jo du alderdi sozialistak, “udala legez behartuta dagoen gardentasuna eta kontu emate printzipioak urratzen baititu”. Bereziki larritzat jo du gainera, udal talde politiko bati ez erantzun izana, “kontrol politikoa herritarren izenean egiteko ardura dugunoi erantzuteko betebehar legal eta etikoa baitago”.
Herritarren aldetik PSE-EEk jaso duen kexa “nagusietako” bat dela “erregistratuko idatziak ez erantzutea” ere mahai gainean jarri du alderdi horrek, “horrekin batera arduradun politikoekin hitz egiteko eta biltzeko zailtasuna ere nabarmen jartzen digute herritar askok”.
Sozialistek eurentzat “onargarria” ez den kudeaketaren “goitik beherako aldaketa” galdegin diote gobernu taldeari, eta horrekin batera konpromiso “eraginkorra” hartzeko “herritarrek merezi dituzten Gobernu Onaren printzipioekin. Gardentasuna, eraginkortasuna eta kontuak ematea ez dira aukerakoak; herritarren konfiantza eta administrazio publikoaren funtzionamendu egokia bermatzeko ezinbesteko betebehar legal eta etikoak dira”.
