Astebeteko musika egitaraua Santa Zeziliaren harira
Gaurtik hasi eta hilaren 28ra bitartean kontzertu zikloa antolatu du Herri Arte Eskolak Santa Zezilia Eguna ospatzeko.
Zorzano eta Ralla emanaldiak hartuko dituzten erretiratuen elkarteetako kideekin. Kontzertu zikloa antolatu du Herri Arte Eskolak, Santa Zezilia Egunaren harira, eta horren barruan hainbat emanaldi egingo ditu gaurtik hasi eta hilaren 28ra arte. Aitor Zorzano Herri Arte Eskolako lehendakariak, eta Beñat Ralla Herri Arte Eskolako zuzendari pedagogikoak aletu dituzte musika programaren barruan ondutakoak. Hala, Kontzertuak Errenteria-Oreretako zenbait jubilatu elkarteetan, zaharren egoitzetan, herriko kaleetan eta Lekuona Fabrikan izango dira.
Musikaren Nazioarteko Eguna, hilaren 22a, beti izan dela oso garrantzitsua aitortuz hasi du hitzartzea Zorzanok, “herrian eta batez ere musikarientzat. Hala ere, guk artetik abordatzen dugun gai bat da eta horren harira esan behar da hainbat kultur eragilek egiten dutela euren programazioa, eta guk ere alea jartzen dugu horren barruan”.
Aurtengoa, programazioa “zabala” dela esan du eta hiru helburu dauzkala zehaztu: “Bere horretan kultur programazioa eskaintzea izango litzateke lehen helburua; kultura deszentralizatu Erdigunetik auzoetara eramanaz; eta, azkenik, adinekoen egoitzetara eta erretiratuen elkarteetara ere eramatea kultura hori, irisgarriagoa egiteko”.
Rallak eman ditu programaren zehaztasunak. Berak ere egitarau “trinkoa” dela aurtengoa esan du, “emanaldi nagusi eta jendetsuena larunbatekoa izango da. Bertan ariko dira arte eskolako bandak, orkestrak eta herri instrumentuen emanaldia izango da dantzariek lagunduta eta hiru ataletan banatua. Gainera, irailean Atlantikaldia jaialdian estreinatu zen Asturiar konexioa dantza eta musika ikuskizuna ere ikusi ahalko da”. Gogora ekarri du Rallak, azken ikuskizun horrek euskal eta asturiar kulturak nahasten dituela, “bi lurraldeetako instrumentuak, doinuak eta dantzak uztartuz”. Lekuona Fabrikak hartuko du ikuskizuna, 12:30ean eta aurkezpena, herri Arte Eskolako Hitzako ikasleek aurkeztuko dute.
Emanaldirako sarrerako doakoak izango dira, baina gonbidapenak beharko dira; horiek Herri Arte Eskolako arreta zerbitzuko bulegoan eskatu behar dira.
Hori larunbatean izango da, baina musika emanaldiak gaurtik hasiko ditu Herri Arte Eskolak. Zehazki, eskola horretako erromeria taldeak kontzertua emango du gaur 18:00etan Jesusen Bihotza adinekoen egoitzan, Bihar, Santa Zezilia Egunarekin bat eginda, berriz, eskolako piano, gitarra eta hari taldeko ikasleek bakarkako edo binakako kontzertuak emango dituzte Agustinak auzoko San Agustin elkartean (18:00); Alabergako La Madalena erretiratuen elkartean (18:00); Kaputxinoetako San Jose erretiratuen elkartean (17:30), eta Beraungo Bienvenido erretiratuen elkartean (18:00).
Azaroaren 24an Udal Txistulari taldeak hartuko du lekukoa eta 09:30ean Erdialdean diana eginda, kontzertu berezia emango du Herri Arte Eskolako txistu eta perkusio ikasleekin eta herriko beste hainbat txistularirekin batera. Kontzertu hori 12:00etan izango da udaletxeko arkupeetan.
Egitaraua ixteko, azkenik, hilaren 28an emanaldia egingo dute eskolako erromeria musika taldeko kideek Sanmarkosene zaharren egoitzan, 18:00etan.
Asteak azken orduko “gehigarri” berezia izango duela erantsi du Rallak: “Sardiniako bost musikari helduko dira gaur herrira, ez genuen aurreikusia eta launedda jotzen dute beraiek. Ez dago egitarau ofizialean sartuta ez zegoelako aurreikusia orain heltzea, baina Santa Zezilia egitarauaren barruan egingo dute ekarpena”.
Ikusteko, eta batez ere, entzuteko asko izango da aste osoan eta programazioarekin bat egitera deitu dituzte herritarrak.
