Abendua hasteko, mendira
Abenduaren 1erako antolatu du Xoxolur Mendi Klubak hurrengo irteera. Oiartzundik hasita, Santiagomendi bere egingo dute.
Xoxolurrekoak, joan den igandean Lapurdira egin zuten irteeran. Sasoiko hirugarren irteera hurbilera egingo du Xoxolur Mendi Klubak. Mugi txartela balia daitekeen horietakoa izango da. Abenduaren lehen egunerako egin dute proposamena: Oiartzungo Iturriotz auzoan hasi, Done Jakue bidea hartu, eta Astigarragako Santiagomendira joango dira goiza hartuko duen ibilbidea egitera.
Abenduaren 1eko (igandea) 08:30ean irtengo dira Oiartzun aldera bidaideak. “Mugi txartela eraman, garraio publikoan mugituko gara”, ohartarazi dute Xoxolurrekoek. Proposamenarekin bat egin nahi dutenek hilaren 28ra arteko epea dute izena emateko, mendizaleen posta elektronikora mezua bidalita.
Xoxolurren aholkuak: bi motxila eramatea, batean ibilbidean zehar erabili beharrekoekin (ura. hamaiketakoa…), eta bestea aldatzeko arropa eta bazkariarekin (auto batean eramango dituzte txango amaierako gunera). Behin Santiagomendi igota, jaitsiera egin eta inguruko pilotaleku edo parke batera joango dira bazkaldu eta jolasean aritzera.
Azaroko irteera hilaren 17an egin zuten Xoxolurrekoek, Lapurdiko Itsasu herriko Mondarrain gainera. Lainopean egin zuten bidea, “badu nolabaiteko misterio eta magia mendian lainopean ibiltzeak”, esan dute. 22 kidek egin zuten bat espedizioarekin; Ezpeletako trinketean bazkaldu eta jolasean aritu ziren ibilaldiaren ondoren.
