PSE-EEk osoko zuzenketa aurkeztu dio gobernu taldearen aurrekontu proposamenari
Aurrekontu proposamena "anbiziorik" gabekoa dela eta udalerriak dituen behar larrienei erantzunik ematen ez diela esan du Isaac Palencia sozialisten bozeramaleak.
Almudena de La Torre eta Isaac Palencia gaurko agerraldian. Osoko zuzenketa. Hori da PSE-EEk hartu duen bidea gobernu taldearen aurrekontu proposamenaren aurrean. Gaur eman du alderdi sozialistak erabakiaren berri, baita hartu duten erabakiaren zioa azaldu ere. “Anbizio falta”, udalerriaren beharrei ez erantzutea, eta 2023-2027 Agintaldi Planean hitzartutako konpromisoei “iskin egitea”, horiek Isaac Palencia sozialisten eledunak osoko zuzenketa aurkezteko eman dituen arrazoiak. Almudena de la Torre taldekidearekin batera egin du agerraldia Palenciak.
Aurrekontu proposamena bere horretan, “galdutako aukera” izango dela ere esan du Palenciak, “aurrekontuak dira udal baten tresna garrantzitsuena herriaren etorkizuna planifikatzeko, eta gobernu taldearen proposamenak ez dio erantzunik ematen presazkoenak diren beharrei. Lehentasun beteko gaiak diren etxebizitza politikak, garapen ekonomikoa edota aparkaleku arazoak, bigarren maila batera eramatea onartezina da”.
Auzoen beharrekin konpromiso falta nabarmendu du, bestalde, sozialistak, “Beraun, Galtzaraborda, Kaputxinoak eta Iztietan bizilagunen bizi kalitateari zuzen-zuzenean eragiten dieten arazo estrukturalei ez diete erantzunik eman oraindik”. Osoko zuzenketa aurkezteko aipatu duen beste arrazoietako bat energia berriztagarrietarako bideratutako aurrekontua izan da, “%85 murriztu dute aurrekontua arlo horretan, eta %50etik gora ingurumen arloan”.
Agintaldi Planari erreparatu dio ondoren Palenciak, eta horren barruan hitzartutako interbertsioko batzuk 2025eko aurrekontu proposamenean ez direla azaltzen gaineratu: “Etxebizitza politiketarako 100.000 euroko inbertsioa zegoen aurreikusia, Beraungo igerilekuen ondoan kirol espazio bat sortzea, Beraungo komertzioaren garapen planaren garapena egitea, Iztieta Ondartxoko merkataritza biziberritzeko proiektua egitea, Galtzarabordako parkea berrantolatzeko idazketa, edota Peñaflorida Kondearen plaza alde zaharrarekin elkartea aurreikusia zegoen eta aurrekontuan ez dira azaltzen”.
