Feminista izango da Oiartzungo udazkena
Oiartzungo Feministen Asanbladak, EHAZEk, Killirikupek, Orgasmok, Coopera Euskadik eta Oiartzungo Udalak Udazken Feminista izeneko egitaraua ondu dute.
Oiartzungo Feministen Asanbladak, EHAZEk, Killirikupek, Orgasmok, Coopera Euskadik eta Oiartzungo Udalak Udazken Feminista izeneko egitaraua ondu dute. Ekitaldietan lehena hilaren 25ekoa izango da, baina herrian ikus daitezke duela egun batzuetatik zenbait panel; irudietakoak, kasu.
Kontzientziazio kanpaina moduko bat egingo du Feministen Asanbladak indarkeria digitalaren aurrean. “Bilgune Feministaren aurtengo gaia indarkeria sexuala da. Noski, horri ere egingo diogu keinua, baina gure kontzientziazio kanpainaren ardatza indarkeria digitala izango da”. Uxue Barrenetxea Oiartzungo Feministen Asanbladako kidea da, eta Indarkeria Matxistaren Kontrako Egunaren harira, aurtengo kanpainaren nondik norakoak eman ditu.
Barrenetxeak azaldu duenez, hilaren 15etik abenduaren 1era bitartean erakusketa moduko bat egongo da ikusgai Oiartzungo plazan, haren inguruan eta baita ikastetxeetan ere. “Pantailen atzean egoten den indarkeria hori bistaratu nahi dugu. Gure asmoa da identifikatzen ez ditugun indarkeria horiei izena jartzea. Izan ere, posible da indarkeria horiek askotan pairatu izana, baina ez dakizkigu identifikatzen. Beraz, horiek identifikatzen eta bistaratzen ikasi nahi dugu”.
Jolasen bidez ahalduntzen
Herrian zehar kokatu dituzten panel koloretsuetan datuak daude, titularretatik eta zenbait txostenetatik atera dituzten datuak. Hamar sortu dituzte orotara, eta panel bakoitzak bere azalpena dauka.
Hamabost eguneko kanpaina bat izango da aurtengoa, eta egunero datu ezberdinak bistaratzen dihardute. Instagrameko oiartzungofeministenasanblada kontuaren bidez ari dira datuak zabaltzen.
Kanpainaren bigarren zatia, berriz, jolas bat izango da. Astelehenean —hilak 25— egingo dute jolasa, eta hitz tekniko batzuk beren azalpenekin lotzea izango da horren helburua. Hala ere, Oiartzungo Feministen Asanbladak emango du iniziatibaren gaineko informazio zehatza eguna gerturatzen den heinean.
Hilaren 25eko hitzordura deitu ditu herriko emakumeak (18:30ean izango da, herriko plazan): “Joera dago muturreko indarkeriak bistaratzeko, bisualak direnak eta azken muturrera iristen direnak, izan erailketa bat, bortxaketa bat, jazarpena… Badira, ordea, jasaten ditugun beste indarkeria mota asko eta ez garenak konturatzen indarkeria direnik. Baina bai, badira. Erailketa bat izebergaren gainazalean dagoen zerbait da, baina barrurago ere badaude indarkeria mota asko, eta hau errotuta dago. Hala ere, eta errotuta egonagatik ere, irauli egin nahi dugu”, erantsi du.
Hilaren 29an, berriz, Euskal Antzerkigintzaren Topaketa Feministak izango dira Landetxen, egun osoan zehar. Ikuspegi feminista euskal antzerkian txertatzeari buruz hausnartzeko jardunaldian parte hartzeko izena eman behar da aldez aurretik: oarsoaldea.hitza.eus atariaan informazioa.
Hurrengo egunean jarraituko du Udazken Feministak, 12:30ean, herriko plazan: greba feminista orokorraren urteurren agerraldia egingo dute. Egun berean, 19:00etan, Zoittu antzezlana emango dute Landetxen.
Egitarauaren azken ekitaldia abenduaren 10ean izango da. Mama film laburraren emanaldia eta solasaldia egingo dituzte Landetxen, 19:00etan.
