Udalak eta Hurkoak hitzarmena berritu dute, "adinekoen arreta indartzeko" asmoz
Pertsonak erdigunean kokatuko dituen "kalitatezko gizarte arretaren alde" egin dute bi erakundeek. "Sare sendoago bat" osatzeko "bermea" dela esan dute.
Pasaiako Udalak eta Hurkoa Fundazioak lankidetza hitzarmena berri dute, bi erakundeen arabera, “adinekoen arreta indartzeko” asmoz. Pertsonak erdigunean kokatuko dituen “kalitatezko gizarte arretaren alde” egin dute. Akordio honek, bereziki, prebentzioari eta adinekoek euren etxeetan jarraitzeari emango die lehentasuna.
Berrikuntza hau “adinekoentzako laguntza sare gero eta sendoago baterantz aurrera egiten jarraitzeko bermea” dela diote udaleko iturriek, erakundearen arabera, “arreta pertsonalizatuak prebentzioa eta esku hartze goiztiarra baititu ardatz, eta horrek ahalbidetzen du adinekoak euren etxeetan denbora gehiagoz jarraitu ahal izatea”.
HerriLab estrategiaren barruan kokatu dute hitzarmena, eta honako helburu nagusia du: tokiko ingurunean hauskortasun, mendekotasun eta konplexutasun kasuetan etengabeko zaintza artikulatzeko formulak aztertzea. Horretarako Hurkoak etxean arreta integrala ematea lehenesten dituela gogorarazi du udalak, “Hauskor programaren bidez, duintasuna, autonomia eta adinekoen eskubideak erdigunean jarriz”.
2027ko abendura arte udalak urtean 58.000 euro bideratuko ditu hitzarmen honen barruko jarduerak finantzatzera. Jarraipen Batzorde bat ere eratuko dutela iragarri dute, ekintzen eraginkortasuna ebaluatzeko, “eskainitako zerbitzuak egokitu eta etengabe hobetzen joateko” asmoz.
Berritutako hitzarmen honekin “gertuko lehen mailako arreta eredu baten alde egiten” jarraitzen dutela esan du Teo Alberro alkateak: “Zaintza arreta integrala arau izango ditu hitzarmen honek, eta gure adinekoen duintasuna eta autonomia errespetatuko ditu. Zaintza eta gizarte ongizatea ez dira helburu bat bakarrik, administrazio gisa dugun erantzukizuna baizik”.
Aintzane Taberna lehen alkateordeak ere bide beretik jo du: “Akordio hau ez da dokumentu bat bakarrik, gure bizilagun zaurgarrienekiko benetako konpromisoa da. Zainketa sare sendo bat eraiki nahi dugu, adinekoei beren etxeetan segurtasunez eta laguntzarekin bizitzeko aukera emango diena, eta gure udalerriko gizarte kohesioa indartuko duena”, esan du.
Hurkoa bezalako erakundeekin lanean jarraitzeko asmoa eta konpromisoa adierazi du udalak, “egoera bakoitzari egokitutako arreta integrala eskaintzeko”, Tabernaren hitzetan. Honako hitzekin bukatu du alkateak: “Pasaia solidarioago eta konprometituago baterantz aurrera egiten jarraitzea da helburua, non babes komunitarioa gure adinekoak, eta, azken finean, pasaitar guztiak zainduko dituen gizarte baten oinarria izango den”.
