Durangoko Azokan izango da Ttur-ttur
'Hikadromoa' antolatu du ZirHika taldeak, hika hitz egitea helburu duen jarduera. Ttut-ttur ZirHikako partaideetako bat da.
ZirHika taldeak Durangoko Azokako berrikuntzetako bat antolatu du: Hikadromoa, izan ere, aurten, euskaltzaleen bilguneaz gain, azoka hikalarien bilgunea izatea ere nahi dute. Ekimena Bagera euskara elkarteak gidatuko du, eta laukoteka egingo dute jarduera. Hamabost minutuero aldatuko dituzte taldeak eta hainbat gai jorratuko dituzte, hikan, betiere.
ZirHika taldea Euskal Herriko hainbat tokitako hika eragileek osatzen dute; Ttur-tturrek, kasu, eta Badihardu euskara elkarteak koordinatzen du. Iaz egin zen Euskal Herriko I. Hika Topaketaren ondoren sortu dute ekimena “elkar ezagutu, indarrak batu eta hitanoa bultzatzeko”.
Abenduaren 7an izango da jarduera, Landako ikastetxean, 16:00etatik 17:45era, eta izena hemen eman daiteke. 943 12 17 75 edo 652 75 09 47 zenbakietara ere deitu daiteke inskribatzeko.
