Pasaia KM0 antzerki jaialdia, ate joka
Abenduaren 5etik 8ra bost emanaldi izango dira Donibanen eta Trintxerpen, "bikainak, bertakoak, hurbilak eta etxean ekoitzitakoak".
Iazko edizioko irudi bat. Pasaiako Udalak dena prest du aurtengo Pasaia KM0 jaialdirako. Datorren abenduaren 5etik 8ra egingo dutela aurreratu du erakundeak. Orotara, bost emanaldi izango dira aurtengo edizioan, Trintxerpen eta Donibanen.
Aitor Brion Kulturako eta Ondareko zinegotziaren arabera, jaialdiak “urtez urte berresten digu zenbateko kalitatea duen gure inguruko sortzaileek”. Aurtengo sorkuntzek “gure komunitatearen indarraz jabetzeko aukera” emango dutela erantsi du zinegotziak: “lan bikainak dira eta bertakoak, hurbilak, etxean ekoitzitakoak”, erantsi du.
Honako helburuak ditu jaialdiak, Brionek zerrendatu bezala: “ohartaraztea zein garrantzitsua den talde sormenaren bidez komunitatea sortzea, eta azaltzea talde sormenak dakartzan onurak eta sortzen duen gizarte kohesioa, belaunaldi desberdinetako eta gizarte errealitate ezberdinetako pertsonen artean sinergiak sortuz”.
Brionek adierazi du emanaldi guztien ondoren solasalditxo bat izango dela, eta edaria eta jatekoa ere eskainiko dutela, “ikusleen eta antzezleen arteko hartu emana elikatzeko”. Bide batez,Badia Plazan elkarteko kideak eskertu ditu, “gure herriari egiten dioten ekarpenagatik”.
Honakoa da egitaraua:
- Abenduak 5 (osteguna da):
- 19:30: Bonbonera taldearen Usuario Desconectado, Trintxerpeko Gudarien plazan.
- 20:00: Anakrusa taldearen Zaborren Arteko Loreak, Trintxerpeko Gudarien plazan.
- Abenduak 6 (ostirala da):
- 20:00: Nueve Teatro taldearen Alguien voló sobre el nido del cuco, Donibaneko Juanba Berasategin. Sarrera doakoa da, baina erreserba egin beharko da, hemen.
- Abenduak 7 (larunbata da):
- 20:00: Aleka taldearen Koltxoi Azpian, Donibaneko Juanba Berasategi aretoan.
- Abenduak 8 (igandea da):
- 19:00: Trebera taldearen Nunca más joven, Donibaneko Juanba Berasategin (sarrerak agortu dira jada).
