'Zoittu' antzezlana estreinatuko dute larunbatean
Udane Alberdi, Ainhoa Txapartegi eta Izaro Zapirain dira aktoreak, eta Irati Muñoz da proiektu berri honen zuzendari eta idazlea.
Udazken Feminista egitasmorako Killirikupe eta Orgasmok elkarlanean sortu duten antzerkia da Zoittu. Udane Alberdi, Ainhoa Txapartegi eta Izaro Zapirain dira oholtza gainean egongo direnak, eta Irati Muñoz da proiektu berri honen zuzendari eta idazlea. Txapartegik, gainera, debuta egingo du antzerkiaren munduan.
Pasa den urtean Luix Mitxelenak, Udane Alberdik eta Irati Muñozek antzerki bat egin zuten Oiartzungo plazan, eta Killirikupekoek ikusi egin zuten emanaldia. Gustatu egin zitzaien, eta aurtengo antzerkian modu batera edo bestera parte hartu nahi zutela esan zieten Orgasmokoei; eta hala izan da. Harremanetan jarri eta Killirikupek antzezlanaren oinarria diren hiru termino helarazi zizkion Muñozi: zahartzaroa, osasuna eta feminismoa.
Mitxelenarekin elkartu zen birritan Muñoz, proiektuari forma eman eta antzezleen zerrenda zein izan zitekeen pentsatzeari ekin zioten, baina Zoittu “Muñozen proiektua” izan behar zela erabaki zuten.
“Nire lehen aldia da dramagile moduan zerbait idazten dudala, eta hitz horiek antzerki batera nola eraman pentsatzeari ekin nion”, dio zuzendariak. Sei eszena independentek osatzen dute Zoittu, sei istorio txikik, eta zahartzaroa dute denek ardatz. “Nire amonengan inspiratu naiz horiek sortzeko orduan. Oiartzun Irratiko entzulea ere banaiz, eta bertako saio batetik ere hartu du eszena bat. Pixkanaka joan naiz idazten kontatu nahi duena”, gehitu du.
“Zahartzaroa gure bizitzan oso presente dagoen zerbait da; denok ditugu edo izan ditugu amonak. Goxotasunarekin lotzen dugu beti zahartzaroa; tira, nik behintzat ez dut inoiz zahartzaroa sentitu zerbait txarra bezala, beraz, antzerkia zahartzaroa gozatzeko izango da”.
Udazken Feminista egitaraurako sortu du Muñozek espresuki Zoittu, eta larunbatean –hilak 30– izango da saioa Landetxen, 19:00etan. Sarrera gutxi geratzen dira, baina horiek hemen eskura daitezke.
