Pentsio duinen aldeko aldarria kalera, astelehenean
Greban diren Sanmarkoseneko langileek bat egingo dute Duintasunaren mobilizazioarekin.
Duintasunaren urriko elkarretaratzea eta manifestazioa. Abednuko lehen astelehenarekin, kalea hartuko du berriro pentsio duinen aldeko aldarriak. Pentsiodunekin batera, greba mugagabean zortzi egun bete dituzten Sanmarkosene zaharren egoitzako langileak aterako dira kalera astelehenean. Egoitza horretan diren adinekoen senideak ere batuko direla protestara jakinarazi du Duintasunak. Ordua betiko bera, 11:00etan elkartuko dira Herriko Plazan batzarra egin eta manifestazioa egiteko, gero.
Kezka azaldu du pentsiodunen elkarteak Sanmarkoseneko gatazkaren harira: “Gureakek pertsonala are gehiago murriztea planteatu du, lanaldiak murriztuz, ordutegiak aldatuz eta horrek zuzen-zuzenean eragingo die erabiltzaileei, eta zerbitzuaren kalitateari”.
Duintasunak bere egin ditu langile horien aldarriak, “horrekin gure senideen bizi baldintzak eta langileek hobetzea baino ez dugu bilatzen”. Egoerak hobera egin beharrean, egunetik egunera okerrera egiten ari dela erresidentzietan gaineratu du pentsiodunen elkarteak, “zalantzarik ez dugu horrek egoiliarren eta langileen baldintzak kaltetzen ditu, eta gainera, senideen artean kezka areagotzen du, baita egonezina ere”.
Prekarietaterik gabeko erresidentzia eredua aldarrikatu du pentsiodunen elkarteak: “Aldundiari gure senideentzako bizitza duina galdegiten diogu, uste dugu merezi dutela”.
Hitzaldia
Herri Ekimen Legegilearen gaineko hitzaldia antolatu dute bestalde, hilaren 3an. Arturo Val del Olmo izango da hizlaria, eta Reina aretoan izango da 11:00etan.
