Aldundia: "Erreakzio kolektibo baten unea da"
Gipuzkoako Foru Aldundiko Diputatuen Kontseiluak Ezohiko batzarra egin eta Pasaiako erailketa matxistaren "gaitzespenik handiena" adierazi du.
53 urte urteko gizon batek bikotekide ohia hil zuen suzko arma batekin larunbatean Pasaian, eta Gipuzkoako Foru Aldundiko Diputatuen Kontseiluak Ezohiko batzarra egin eta “krimen matxista horren gaitzespenik handiena” adierazi du. Era berean, “minik sakonena eta gertukoekiko elkartasuna eta hurbiltasuna” ere adierazi nahi izan ditu Kontseiluak. Alabaina, “gertaera larri honen aurrean” babesa eman dio Pasaiako herri osoari.
Gipuzkoako Emakumeen Aurkako Indarkeriari Aurre Egiteko protokolo instituzionala jarraitu du Kontseiluak, eta Gipuzkoako Foru Aldundiak bat egin du Pasaiako Udalak publiko egin duen gaitzespen adierazpenarekin. Gainera, elkarretaratzea egin dute gaur eguerdian Diputazioaren jauregiaren parean “hilketaren aurrean bere samina eta gaitzespena adierazteko”. Halaber, erailketaren harira deitzen diren gaitzespen ekitaldiei babesa adierazi die.
Emakumeen aurkako indarkeriak erasotzaileak eta banakako biktimak dituela dio Foru Aldundiak, eta gehitu du hori emakumeen gaineko kontrola eta nagusitasuna betikotzea helburu duen egiturako arazo baten ondorio dela. Are, indarkeria hori ez dela ekintza isolatuen edo azalpenik ez duten gertakarien emaitza azpimarratu dute. “Aitzitik, genero prejudizioetan oinarritutako sozializazio iraunkorraren ondoriorik larriena eta muturrekoena da, emakumeak desberdintasun egoeran mantentzen dituena eta gizonekiko berdintasunean herritar gisa aitortzea eragotziz, beren oinarrizko eskubideak eragingarri bihurtzen dituena “.
Pertsona ororen bizitzarekiko eta askatasunarekiko errespetua giza eskubide urraezina dela esanaz jarraitu dute gero, eta erantsi dute eskubide hori, gizarte gisa, “irmo” defendatu behar dela. “Gero eta indar handiagoz adierazten diren korronte eta mezu negazionisten aurrean, Pasaiako hilketak erabateko gordintasun osoz erakusten du berdintasun faltaren adierazpenik muturrekoena eta mingarriena, eta, zoritxarrez, oraindik asko falta dela erabateko berdintasuna lortzeko. Berdintasunaren aldeko konpromisoaren unea da, erreakzio kolektibo baten unea, beste behin ere, irmotasunez adierazteko ez ditugula horrelako jarrerak onartzen gure lurraldean eta gure herrialdean, pertsona guztiok dugula berdintasunean eta askatasunean bizitzeko eskubide osoa”.
Ondorioz, Gipuzkoako Foru Aldundiak berretsi du beharrezkoa dela emakumeen eta gizonen berdintasunerantz aurrera egitea “indarkeria matxistarik gabeko lurraldea eraiki ahal izateko, emakumeak berdintasunean eta askatasunean erabat bizi ahal izateko”. Amaitzeko, esan dute “ahalegin osoz” jarraituko dutela zeregin horretan gainerako euskal erakundeekin, emakumeen elkarteekin eta mugimendu feministarekin elkartean “gure gizarteko emakumeen aurkako indarkeria behin betiko desagerraraztea lortu arte”.
