Eskubaloiaz gozatzeko aukera izango dute gazteek Gabonetan
Ereintzak eta Munttarpek Gabonetako eskubaloi campusa antolatu dute. Aurtengoa hilaren 23an, 26an, 27an eta 30ean eta urtarrilaren 2an eta 3an izango da. Hilaren 9a da izena emateko azken eguna.
Errenteria-Oreretako Ereintzak eta Lezoko Munttarpek 2011 eta 2016 urteen artean jaiotako gazteei begirako Gabonetako eskubaloi campusa antolatu dute, elkarlanean. Campusak sei eguneko iraupena izango du, eta eskualdeko gazteek hilaren 23an, 26an, 27an eta 30ean eta urtarrilaren 2an eta 3an izango dute eskubaloian trebatzeko aukera. Saioak Errenteria-Oreretako Galtzarabordako kiroldegian eta Lezoko Bekoerrota kiroldegian izango dira, 09:30etik 13:30era. Elkartzeko puntua, baina, Galtzarabordako kiroldegia izango dela adierazi dute antolatzaileek.
Hilaren 9a da izena emateko azken eguna, eta horretarako esteka honetako galdetegia bete behar da. Parte hartzeko prezio orokorra 95 eurokoa da pertsona bakoitzeko, eta bigarren senideak 85 euro ordaindu beharko ditu. Klubetako bazkideek, aldiz, abantailak izango dituzte. Bazkide direnen prezioa 90 eurokoa da pertsona bakoitzeko, eta bigarren senideak 80 euro ordaindu beharko ditu. Informazio gehiagorako, antolatzaileek helbide elektronikoa jarri dute interesdunen eskura.
