Gogor salatu dute Lezoko Udalak eta eragileek Antxoko hilketa matxista
Atzo Antxon egin zen elkarretaratzean izan ziren lezoarrak, tartean Lezoko Udaleko ordezkaritza zela.
Atzo Antxon egin zen elkarretaratzearen une bat. Lezoko Udalak, eta Iruntzen Lezoko Emakume Taldeak, Piztu Lezok eta Gaxuxa Emakume Elkarteak aho batez eta gogor salatu dute larunbatean Antxon izan zen hilketa matxista. Bortizkeria matxistaren kontra daudela esateaz gain, larunbateko hilketa gaitzetsi eta horren kontrakotasuna erabat azaldu dute. “Horrelako erasoak ez ditugu gure jendartean onartzen, eta erakunde, elkarte eta herritarrok lanean jarraituko dugu, emakumeok indarkeria matxistarik gabe bizi gaitezen. Emakumeen aurkako indarkeria gehiagorik ez!”.
Atzo eguerdian Antxoko Biteri plazan egin zen elkarretaratzean hainbat lezoar izan ziren, tartean aipatutakoak. Udalaren izenean Mikel Arruti alkatea eta hainbat zinegotzi bertaratu ziren hara, hilketa gaitzetsi, eta hildakoaren senide eta hurbilekoei babesa agertzera.
