Saharan izango da Bixi-bixi elkartea larunbatera arte
Bi egun daramatza Saharan Bixi-bixik, eta larunbatera arte egingo du egonaldia. Ausarteko gobernadorearekin bildu dira Oarsoaldekoak.
Bixibixi Kultur Elkartea Saharara joan da, eta bi egun daramatza bertan dagoeneko. “Sentimendu nahasiekin, motxilan lanerako daramaten zama guztia betetzeko denbora izango duten beldurrarekin baina pozik, lanerako irrikaz eta indartsu”, dio Bixi-bixi elkarteak Saharako lehen egunari erreferentzia eginez.
Familiak “goxo” agurtu eta lanean hasi ziren lehen egunean. Gormutuen eskolara joan ziren, eta bertako zereginak eta konpondu beharrekoak zerrendatu zituzten: argi indarra, lurra, leihoak… Ura, esaterako, badute edaterik, Bixibixik zehaztu baitu aurretiaz hormigoizko depositu bat jarria zutela.
Agueniteko ospitalea izan zen eguneko bigarren geldialdia, eta, egoitza “oso egoera tristean” dagoela nabarmendu du talde pasaitarrak. Zehaztu dutenez, emakumeek oso egoera prekarioan erditzen dute: ez dute aire egokiturik eta askotan 50 gradu egiten ditu bertan; leiho zaharrak dituzte; erditzeko mahai zahar bat dute; ez dute materialik, eta erditu ondoren egoteko koltxoi zahar zikin bat dute. “Barruak mugitzen dituen egoera lazgarria da, benetan”.
Halaber, albiste onak ere helarazi dituzte Saharatik, ospitalea “egoera txukunean” geratuko dela aurreikusi baitute. Odola ateratzeko tresnak, tentsioa neurtzeko makina eta ume jaio berrientzako xanpua nabarmendu dituzte egindako erosketen artean. Era berean, Pasai Donibane eta Lezoko herritarrek emandako arropak eraman dituzte ospitalera hemendik aurrera jaiotzen diren umeek erabil ditzaten.
Egindako lan fisikoaz gain, Bixi-bixiko talde batek gobernadorearekin hitzordu bat eskatu du; bai lortu ere. Eguna familia gehiago bisitatuz amaitu dute, eta Sahararrak “dena emateko prest” daudela diote. “Ez dutena ere ematen dute!”.
Bigarren egunean Ausarteko gobernadorearekin bildu ziren Oarsoaldekoak, eta hezkuntza, osasuna eta lan munduratzea bideratzeko formazioa online jasotzeko aukeraren berri eman zioten hari. “Proiektu hau oso lagungarria izan daiteke bertakoei irakasle eta mediku izaten laguntzeko, baita lanerako ideia berriak dituztenei formatzen laguntzeko ere. Proiektu zabal baina oso emankorra izan daiteke”, diote.
Ospitale txikian eta gormutuen eskolan aurrera pausuak eman dituzte, argia, leiho berriak, ur edangarria eta barruko material berria jarri baitituzte.
Bigarren eguna amaitzeko “afari berezia” egin zuten Euskal Herritik eramandako produktuekin, eta, besteak beste, Euskal Herriko txuletak eta ardi gazta dastatzeko aukera izan zuten hango familiek. Honela deskribatu du unea Bixi-bixik. “Momentu magikoa izan zen. Udan Euskal Herrian egondako umetxoak produktuei agurra dantzatu ondoren afaltzen hasi ziren afaltzen, gozamena izan zen”. Tertulia luze batekin agurtu zuten egonaldiko bigarren eguna.
Larunbat gauera arte egongo dira bertan, eta elkartearen sareetan zabalduko dute egun bakoitzeko jarduna zein izan den.
