Kulturarteko elkarbizitzan urratsak egiten jarraitzeko
Errenteriako Kulturarteko Elkarbizitzarako II Plan Estrategikoa 2024-2029 onartu berri du udalak.
11 kolore jaialdia antolatzen dute besteak beste kulturarteko elkarbizitza sustatzeko. Kultura aniztasunaren aldeko politiketan jarraitzeko ibilbide orria izango da Errenteriako Kulturarteko Elkarbizitzarako II Plan Estrategikoa 2024-2029. Onartu berri du udalak plan hori, eta agiri horretan kulturarteko elkarbizitzari dagokionez bere ortzi muga definitu du: nondik begiratu nahi dien kultura aniztasunei, eta nora iritsi nahi duen. Ibilbide orria izatearekin batera, kultura aniztasunaren aldeko politiken jarraipena eta balorazioa egiteko mekanismoak ere jasotzen ditu planak, eta udalak azaldu duenez, azken horiek balioko omen dute proposatutako ekintzen betetze maila neurtzeko, baita bete ez direnen kasuan, arrazoien inguruan hausnartzeko ere.
Plan horretan definitu diren helburu berriak lortzeko zenbait ekintza berritzaile proposatu dituzte. Hala, azaldu dute asmoa dela herrian harrera egiteko protokolo bat zehaztea, baliabide tresnen gida berria diseinatzea, eta etorkizunean harrera bulego bat izateko lehen harria jartzea.
Orain arte arloko departamenduak antolatutako ekintza nagusiei eutsiko diela jakinarazi du udalak halaber: 11 kolore jaialdia, eta Giza Eskubideen Jardunaldiak. Hezkuntza sistemarekin lanean jarraituko du udalak, bestalde, eta ikastetxeetan kulturarteko bizikidetzan sakontzeko elkartasun proiektu bat sustatuko du udalak familia iritsi berriei komunitatearen parte izatea errazte aldera. Horri begira familia lagun sareak sortzea aurreikusi du. Horrekin batera, DBHko ikasgeletan kultura aniztasuna landuko da aurten ere.
Kultura Aniztasuna, Garapenerako Lankidetza eta Giza Eskubideak departamenduak sustatutako ekintza da plana baina diseinatzeko prozesuan beste udal sailekin eta arloko herri eragileekin aritu da eskuz esku.
Plan estrategikoaren printzipio gidariez ere mintzatu da udala, eta hala, zeharkakotasuna, feminismoa eta intersekzionalitatea, parte hartzea eta ikuspegi komunitarioa, eta kreatibitatea eta malgutasuna dituela gako jarri du nabarmen. “Errealismoz eta herriak dituen baliabideak kontuan hartuta egindako plana da”, gaineratu du. Ildo estrategikoak, bost dira: Eskubide eta aukera berdintasun erreala eta diskriminaziorik eza; kulturarteko ikuspegia udal barnean eta beste erakunde batzuekiko harremanean; kulturarteko bizikidetza; eta partaidetza eta herritartasun aktiboa.
Plan estrategikoa hemen klik eginda irakur daiteke.
