PSE-EE abstenitu egin da 2025eko aurrekontuen bozketan
Alderdi sozialistak adierazi du proposatutako neurri sortak "gabezia garrantzitsuak" dituela. Hori dela eta, ez diete "erabateko babesa" eman.
Aurreko ostegunean egindako osoko bilkuran, 2025eko Lezoko aurrekontuak onartu ziren. Lezoko PSE-EE abstenitu egin zen bozketa horretan, eta alderdi sozialistak osoko mozio bat eta 24 zuzenketa partzial aurkeztu ditu. PSE-EEk adierazi du abstentzio horrek “herritarren interes orokorrekiko jarrera arduratsua eta konprometitua” islatzen duela. Joxean Sanchez udal bozeramaileak azaldu du gobernu taldeak PSE-EEk proposatutako ekarpen batzuk txertatu dituen arren, aurrekontuek “gabezia garrantzitsuak” dituztela, eta horrek “erabat babestea” eragozten diela.
Udal bozeramaileak nabarmendu du PSE-EEk aurkeztutako hainbat neurri jaso dituztela datorren urteko udal aurrekontuetan; hala nola, honakoak: Euskal Herria parkea estaltzea; haur parkeak berritzea; gizarte erakundeentzako eta gizarte larrialdietarako laguntzak handitzea; migratzaileei harrera egiteko protokolo bat egitea; nahi ez den bakardadea prebenitzeko programa bat abiatzea; edo eskola materiala erosteko laguntzak. “Egitasmo horiek guztiek elkarrizketarako eta adostasunerako dugun gaitasuna erakusten dute”, esan du Sanchezek.
Udal gobernuak neurri horiek txertatu baditu ere, aurrekontuetan “udalerriaren garapen orekatua bermatzeko konpromiso irmoen falta” sumatzen dela adierazi du udal bozeramaileak. Konpromiso falta hori “funtsezko” eremuetan antzematen dela zehaztu du Sanchezek, hala nola: aparkalekuan, etxebizitzan, auzoen mantentze lanetan eta ingurumenaren iraunkortasunean.
Horrez gain, onartutako dokumentuak epe ertain eta luzerako “estrategia argirik” ez duela salatu dute, haien ustez ez baitute erantzuten “herritarrei eragiten dieten erronka ekonomiko eta sozialei”. Iraunkortasunaren esparruan, 2030 Agenda aurrera eramateko partidarik aurreikusi ez dela zehaztu du alderdi sozialistak, eta hori “kezkagarria” dela uste dute.
“Abstentzio honekin, Lezok eredu inklusiboago baterantz aurrera egiteko lanean jarraitzeko prest dagoela berretsi du talde sozialistak, udalerriko eta bertako bizilagunen benetako eskari eta beharrei erantzungo diena”, baietsi du Sanchezek.
