Zortzi plaza kirol gune bilakatuta euskararen alde
Euskararen Egunaren harira herriko kirol elkarteek ginkana antolatu zuten 12 eta 18 urte arteko gazteei begira.
Euskararen Egunaren harira kirol ginkana. Euskararen Egunaren hamabostaldiaren barruan, kirol ginkana antolatu zuten herriko kirol elkarteek joan den igandean. Ginkana hori 12 eta 18 urte arteko gazteei begirakoa zen eta egunerako espresuki kirol gune bilakatu ziren zortzi plazetan aritu ziren norgehiagoka dozenaka lagun. Sei kirolariz osatutako 34 talde aritu ziren denera euskararen alde antolatutako kirol proban.
EPLE eta Hibaika Zumardian izan ziren, Oarsotri eta Otxe Txirrita parkean, Oiarso Koldo Mitxelenako estalpean, Ereintza Foru plazan, Touring Xabier Olaskoaga plazan, Beraun Bera Merkatuzarren, eta Oarso Boleibol taldea Gernika plazan. Horiz gain, Marpex, beti Ona, Orereta Kafe eta Bidasoaldea elkarteko kideak ere aritu ziren ginkanan. Kirol elkarteek joko bana prestatu zuten, eta gazteek 10 minutu zituzten aritzeko bakoitzean. Talde guztiak zortzi plazetatik pasa eta gero, azken froga egin behar izan zuten: Euskara barra barra ikurra zuten dendak denbora zehatz batean aurkitzea eta bertan selfiak egitea.
Plaza bakoitzean garaipena lortu zuten taldeek sari bana jaso zuten bertako elkarte kudeatzaileen eskutik, eta euskara barra barra ikur gehien aurkitu zituen taldeak ere oparia jaso zuen Leire Mazizior Hizkuntza Politika zinegotziaren eskutik. Parte hartzaile guztiek oroigarri bat jaso zuten, gainera.
Udalak eskerrak eman dizkie parte hartu zuten kirol elkarte guztiei.
