Zezensuzkoa Lezoko sukaldeetan
2025eko udal egutegien azalean sua eta txinpartak izango dira nagusi. Raul Jimeno Martinezek irabazi du egutegi horiei lotutako argazki lehiaketa, santakrutzetako suzko zezenarekin.
Honakoa da 2025eko udal egutegien azaleko irudia. Argazkilaria: Raul Jimeno Martinez. 
Raul Jimeno Martinez (erdian), Mikel Arruti alkatearekin eta Jon Legorburu Kultura zinegotziarekin.
Euskal Herriko sukaldeetako horma gehienetan izaten dira zintzilik egutegiak. Etxeko gelarik emankorrenean jartzen dira askotan urteko 365 egunen (aurten 366 izan dira) zerrenda duten afixak. Lezoarrek, nahi badute, santakrutzetako zezensuzkoa izan dezakete euren su ondoan 2025eko egun guztien berri izateko. Hura izango da udal egutegien azala, Raul Jimeno Martinezek egindako irudiari esker. Jimeno izan da udalaren argazki lehiaketaren irabazlea. Jon Legorburu Kultura zinegotziaren eta Mikel Arruti alkatearen eskutik jaso du saria (ondoko argazkian).
Jimeno ez da saridun bakarra izan. Harena da egutegiaren azala, baina datorren urteko hamabi hilabeteek argazki bana izango dute alboan, finalista izendapena jaso duten dozena bat argazkiren ondoan joango direlako hilabeteei dagozkien 28, 30 edo 31 laukitxoak. Izan ere, orotara 178 argazki aurkeztu dira egutegirako argazki lehiaketara, eta epaimahaiko kideek lan nekeza izan dute irabazlea eta hamabi finalistak aukeratzeko. Honakoak dira hamabi finalistak eta irabazlea, 2025 urteko hilabeteen ordenaren araberako zerrendan:
- Azala. Argazkiaren egilea: Raul Jimeno Martinez. Argazkiaren izenburua: Santo Kristo plaza, gauez.
- Urtarrila. Argazkiaren egilea: Rebeca Hernandez Perrino. Argazkiaren izenburua: Pakea.
- Otsaila. Argazkiaren egilea: Abel Corchero Vazquez. Argazkiaren izenburua: Eguneroko uneak.
- Martxoa. Argazkiaren egilea: Nuria Beltran Celemin. Argazkiaren izenburua: Depósito Jaizkibel.
- Apirila. Argazkiaren egilea: Claudia Espasandin Marcos. Argazkiaren izenburua: La vida de Lezo.
- Maiatza. Argazkiaren egilea: Aleksandr Evstigneev. Argazkiaren izenburua: Luz de Lezo.
- Ekaina. Argazkiaren egilea: Alexander Herrera Albear. Argazkiaren izenburua: Altamiratik.
- Uztaila. Argazkiaren egilea: Zuriñe Urbieta Lekuona. Argazkiaren izenburua: Altamirako basoa.
- Abuztua. Argazkiaren egilea: Iñaki Nogueira Rufo. Argazkiaren izenburua: Jaizkibel laino “art”-ean.
- Iraila. Argazkiaren egilea: Ioritz Urbieta Lekuona. Argazkiaren izenburua: Danborrada.
- Urria. Argazkiaren egilea: Zuriñe Urbieta Lekuona. Argazkiaren izenburua: Igerilekuko zuhaitzak udazkenean.
- Azaroa. Argazkiaren egilea: Alazne Salaberria. Argazkiaren izenburua: Gaubeltza badator.
- Abendua. Argazkiaren egilea: Ana Zabala Huizi. Argazkiaren izenburua: Olentzero Platiturrin.
Banaketa
Behin argazkiak izanda, orain egutegiak inprimatzea eta banatzea falta da. Udalak jakinarazi du paretako 1.500 egutegi egingo dituela, baita mahaietan jartzeko beste 400 ere, txikiagoak. Hala, horien bila hilaren 19tik aurrera joan daitezke lezoarrak Kultura Aretora, hura zabalik den ordutegian. Lasai joan daitezela horiek hartzera, denentzat izango baita baten bat
