Lezo Palestinarekin jardunaldiak, hilaren 13 eta 14an
Txerrimuñon Lezo Palestinarekin jardunaldiak egingo dituzte bi egun horietan, herriko gune autogestionatu eta askearen 41. urteurrenarekin bat eginez.
Palestinako herriarekin elkartasuna era praktikoan azaltzeko aukera izango dute lezoarrek eta hala nahi duten guztiek hilaren 13 eta 14an. Txerrimuñon eta Karlos Saldise plazan Lezo Palestinarekin jardunaldiak egingo dituzte bi egun horietan, herriko gune autogestionatu eta askearen 41. urteurrenarekin bat eginez (17an egingo dituzte urteurrenaren barruko ekitaldiak). Jardueren berri izateko baliatu esteka hau (egitarau osoaren kartela da).
Hainbat izango dira hilaren 13ko arratsaldetik (ostirala da) 14ko gauera arte egingo direnak. Palestinako egoeraz jabetzeko eta Israelen genozidioaren berri izateko dokumentalen proiekzioak nahiz hitzaldiak izango dira, tailerrak egingo dituzte, musika kontzertuak ez dira faltako, eta aldi berean postuak jarriko dituzte. Txerrimuñon eta Karlos Saldise plazan egingo dituzte horiek guztiak. Postu horietan tatuajeak egiteko aukera izango da, makillatzekoa, hortzetan harribitxiak jartzekoa, baita azkazalak txukundu edo lifting-a egiteko aukera ere. Jarduera guztiekin bilduko den dirua Palestinara bideratuko dute.
«Lezotik Palestinako herriari gure eskura dauden baliabide guztiekin modu aktiboan elkartasuna adierazteko, eta aldi berean Israelen proiektu etnonazionalista, genozida eta terrorista horren bukaeran laguntzeko beharra ikusten dugu», esan dute antolatzaileek.
Topaketan parte hartzeko eskatu diete lezoarrei, «erresistentzia palestinarrarekiko elkartasuna Lezora heldu da», adierazi dute. Informazio gehiago nahi dutenek antolatzaileen Instagrameko kontuarekin bat egin dezakete.
