Errenteriako XXII. San Silbestrerako izen ematea, zabalik
Azken urteetan bezala, 7 eta 3,5 kilometroko lasterketak antolatu ditu Errenteriako Atletismo Taldeak hilaren 31rako. Txikien lasterketak ere izango dira.
Iazko lasterketaren irudia da honakoa.EAT 
Besteak beste, elastiko hau jasoko dute izena ematen dutenek.
Prest du Errenteriako Atletismo Taldeak (EAT) 2024ko San Silbestre lasterketa. Orian, korrikalariak apuntatzea besterik ez da falta. Errenteriako XXII. San Silbestre lasterketa hilaren 31ko arratsaldean izango da: lasterketa nagusiak 17:00etan hasiko dira, eta haurrei begirako txikiak 16:30ean. Nagusian, azken urteetan bezala, bi aukera: 3,5 kilometro egitea (herriko zirkuituari bira bat) edo 7koa (bi bira). Lasterketa motzean 14 urtetik gorakoek parte har dezakete; luzean 16tik gorakoek.
Lasterketa nagusietarako aldez aurretiko izen ematea zabalik da joan den azaroaren 18tik. Bai 3,5ekoan nahiz 7koan dortsalaren prezioa berbera da, 15 eurokoa: horren euro batek elkartasun helburua izango du, Juneren Hegoak elkarteari emango diotelako izena ematen duen pertsona bakoitzeko euroa. Izen ematea egikaritzeko baliatu esteka hau. Aurreko izen ematea abenduaren 29ra arte izango dela zabalik azaldu du EATk, eta dortsalak libre geldituko balira, horiek abenduaren 30 nahiz 31n eros daitezke, baina aurrez aurre. Izan ere, bi egun horietan dortsalak jasotzeko gunea ezarriko du EATk Galtzarabordako kiroldegian, eta hori baliatuz lortu ahal izango dira azken orduko dortsal horiek. Hilaren 30ean 10:00-13:00 eta 17:00-20:00 tartean izango dira EATkoak dortsalak banatzen, eta 31n 10:00etatik 13:00etara.
San Silbestre Txikiak hiru izango dira. 16:30ean, Benjamin Mailakoen lasterketa hasiko da, 16:40an Kimu Mailakoena, eta 16:50an Haur Mailakoena. 1.000 metroko bidea dute horien lasterketek. Txikien izen ematea doan da, eta dortsalak hilaren 30 eta 31n jaso behar dira, Galtzarabordako kiroldegian, lasterketa nagusirako dortsalen banaketarako prestatutako ordutegi berberean. Txikien lasterketetan izena emateko baliatu esteka hau.
