Altzate sarrerako estalkia ordaintzeko aldundiaren laguntza jaso du udalak
Aldundiak 96.000 euroko laguntza eman du. Gaur izenpetu dute akordioa Azahara Dominguez diputatuak eta Mikel Arruti alkateak.
Dominguez eta Arruti, gaur Altzaten. Altzate igerilekuaren sarrerako estalkia edo teilatuaren jarraipen hegalaren lanak finantzatzeko laguntza eman du Gipuzkoako Foru Aldundiko Mugikortasun, Turismo eta Lurralde antolaketa departamentuak. Jada eginak daude lan horiek. Osotara, aldundiaren ekarpena 96.000 eurokoa da, iaz 15.724,03 euro eman zituen, eta aurten 80.275,93. Gaur izenpetu dute finantzazio akordioa Azahara Dominguez diputatuak eta Mikel Arruti alkateak. Altzatera ere bisita egin dute, lanen nondik norakoen berri izan zezan Dominguezek.
Aldundiko kideak jarduketa “Pasaiako badiaren ingurua biziberritzeko” inbertsioen barruan kokatu du, “lehentasunezko ardatz estrategiko dira nire sailarentzat jarduketa horiek”, azaldu du Dominguezek. “Herritarren benetako beharrei” erantzuteko konpromisoa azaldu du Lezon diputatuak, Altzateko lanena horren seinale bezala jarriz. Inguruko biztanleen bizi-kalitatea hobetzeko zereginean kokatu ditu Altzateko lanak.
Arrutik eskerrak eman dizkio aldundiko ordezkariari ahalegin ekonomikoagatik, eta lezoarren bizi-kalitatean eragin baikorra izateko aldundiak azaldu duen prestutasunagatik, “funtsezkoa dugu administrazio ezberdinen arteko lankidetza herriaren biziberritzeak behar dituen inbertsioei begira, gurea bezalakoa den udal batek ezin baitio bere baliabideekin bakarrik aurre egin inbertsio denei”. Elkarlanerako prestutasuna azaldu dio Arrutik aldundiaren ordezkariari, “gisa honetako hitzarmen gehiago sinatzeko lanean jarraituko dugu”.
