"Nazkatuta gaude. Baboso eta erasotzaileak kanpora"
Lezoko eta Errenteria-Oreretako mugimendu feministak deitua, larunbateko eraso matxista salatzeko elkarretaratzea egin dute.
Erantzun irmoa eman dio mugimendu feministak larunbateko eraso matxistari. Emakume batek gizon baten erasoa jasan zuen Lezo eta Errenteria-Orereta artean. Bi udalerrien mugan, Renfeko geltokiaren parean, elkarretaratzea egin dute gaur ilunabarrean. “Nazkatuta gaude. Baboso eta erasotzaileak kanpora”, esan dute. Nazka-nazka eginda eta amorruz daude emakumeak: “Indarkeria matxista gure eguneroko ogia den bitartean gure hautua autodefentsa da, eta horretan jarraituko dugu”, adierazi dute. Erasoa jasan duen emakumeari elkartasuna eta babesa adierazi diete bertaratutakoek, baita haren senide eta gertukoei ere.
Dozenaka lagun bildu dira geltokiaren pareko mobilizazioan. Lezoko eta Errenteriako udalek bat egin dute, besteak beste, mobilizazioarekin. Gipuzkoako Foru Aldundiak ere gaitzetsi egin du eraso matxista.
Izan ere, erakundeetatik datozen neurri asistentzialekin ez direla konformatzen azaldu dute elkarretaratzea bitartean hitz egin dutenek: “Herrietan sufritzen ditugun indarkeriak errotik ezabatzeko, poliziaren eta epaileen neurri zigortzaileez gain, bestelako ekintza eta neurriak behar ditugu”. Hala, herri eta auzoetan libre bizitzeko eskubidea aldarrikatu, eta emakumeek espazio guztiak hartu behar dituztela baietsi dute, “nonahi, noiznahi, nolanahi, bide eta espazio guztietan, libre mugitzeko eskubidea aldarrikatzen dugun ozen”.
Bakarkakoa edo kolektiboa, baina autodefentsa. Erasotzaileak izen-abizenekin ezagutu eta kaleetatik baztertu, “kanporatu arte”; hori Errenteria-Oreretako eta Lezoko mugimendu feministaren erabakia: “Erasoen aurrean ez gara kikilduko ezta ixilik geratuko. Erasoen aurrean ekintza zuzena. Gora borroka feminista!”.
