Kirolaren balioak omendu dituzte Kirol Galan
Atzo udalerriko kirolari gorazarre egin zioten Lekuona Fabrikan. Herriko hainbat klub, kirolari, erakundeetako arduradun eta kirolari lotutako pertsonak bildu ziren.
Atzo 2024ko Errenteria-Oreretako Kirol Gala jaso zuen Lekuona Fabrikak. Herriko hainbat klub, kirolari, erakundeetako arduradun eta kirolari lotutako pertsonak bildu ziren bertan. Aretoa lepo bete zen, 250 lagun inguru elkartu baitziren Lekuonan Errenteria-Oreretako kirolari eta kirolariei gorazarre egiteko. Aizpea Otaegi alkatea ere Kirol Galan izan zen. Otaegik herriko kirola zoriondu zuen 2023-2024 denboraldian erdietsitako lorpenengatik, eta lanean jarraitzea animatu zituen Lekuonan bildutako guztiak.
2024ko ekitaldian kirolak ordezkatzen dituen balioak omendu dira Errenteria-Oreretako hainbat pertsona eta kirol erakunderen bitartez. Omendutako balioak, honakoak: errespetua, konpromisoa, konstantzia, inklusioa, berdintasuna, talde lana, estrategia eta erresistentzia.
Errespetuaren errekonozimendua Orereta Rugby Taldearentzat izan da. Jakina da errugbian errespetua izan ohi dela nagusi talde eta aurkari guztien artean, eta 1985ean sortutako talde hori omendu zuten atzo. Konpromisoaren garaikurra Alain Kortabitarte eta Andy Criere kirolarientzat izan da. Kortabitartek skatean eta Crierek surfean Parisko Olinpiar Jokoetan hartu zuten parte, eta haien jarduna bistaratu zen atzoko ekitaldian. Konstantziaren saria Juan Mari Madinazkoitiarentzat izan da. Madinazkoitiak 50 urte baino gehiago eman ditu saskibaloiko epaile gisa, eta udalerriko kirolean ere aktiboki aritu da lanean.
Inklusioaren esparruan Ereintza Eskubaloi taldearen egitasmoa errekonozitu dute, iaz talde egokitua sortu baitzuten. Berdintasunaren saria Mindara elkartearentzat izan da alor horretan egiten duen lanagatik. Talde laneko errekonozimendua Errenteria Atletiko Taldeko 16 urtez azpiko taldeak eraman du, Espainiako Atletismoko Txapelketa Nagusia jokatzeko sailkatu baitziren. Estrategiaren garaikurra Beraun Bera Xake Taldeko Oier Gonzalez kirolari gaztearentzat izan da, osatutako denboraldi bikainagatik. Azkenik, erresistentziaren omenaldia Sebastian Latigo Perez boxeolariarentzat izan da. Latigok 2010ean egin zuen debuta kirol horretan, eta ordutik nazioartean lehiatu da, hainbat titulu ere lortuz.
Kirol Galako ekitaldian Ereintza Dantza Taldeak eta Herri Arte Eskolako Antzerki Taldeak ere hartu zuten parte. Aizpea Otaegi alkatea, Leire Mazizior Kirol zinegotzia eta udal korporazioko bozeramaileak ere Lekuonan izan ziren.
Kirol Galaren bidez, Errenteriako Udalak bere babesa adierazi die herriko kirol erakundeei; alkateak esan zuen bezala, “kirolak gizartea eraldatzeko eta kohesionatzeko ahalmena” baitu. Galan zehar, udalerriko kirolaren 2024ko parte hartzea jasotzen duen bideo bat proiektatu zen. Ikus-entzunezko pieza hori udalaren webgunean dago ikusgai.
