25 urteko jarduna ospatzeko, Oiartzun Irratia Ga-La
Zuzeneko irratsaio baten itxura duen saioa hilaren 24an izango da, Landetxen. Doan da emanaldia, baina gonbidapenak aurrez eskuratu behar dira.
Oiartzun Irratiak 25 urte beteko ditu aurten, eta gaurdaino egindako ibilbidea ospatzeko eta “2025. urtea indartsu hasteko aurkezpen ekitaldi berezi” bat antolatu dute: Oiartzun Irratia Ga-La. Irratiaren ateak ireki nahi dituzte; baita Oiartzun Irratia zabaldu ere “herriko irratia herritar guztien bozgorailu izan dadin”.
Zuzeneko irratsaio baten itxura izango du antolatu duten ekitaldiak, eta hilaren 24an –ostirala– izango da, 19:00etan, Landetxen. Saio horretan programazio berria ezagutarazi, kolaboratzaileak aurkeztu, musikariekin solasaldia alaitu eta herritarrekin “tarte atsegin bat” pasa nahi dute. Gainera, aurreratu dute saio horretan lehiaketak ere izango direla, eta gehitu dute herriko establezimenduek eskainitako “sari mundialak” egongo direla bertaratzen direnen artean zozketatzeko.
Ordubete inguruko saioa izango da, eta gonbidapenak aurrez eskuratu behar dira, hemen.
