Aurrekontuen negoziazioan "zintzotasunez eta erantzukizunez" jokatu duela dio EAJk
Abendu bukaeran onartutako 2025erako aurrekontuaren gaineko balorazioa egin du EAJko bozeramaile Loreto Osak.
Abendu bukaeran Pasaiako Udal Gobernuak 2025erako 27,3 milioi euroko aurrekontua onartu zuen, EH Bildu eta Podemosen aldeko botoekin. Oposizioko bi taldeek (EAJ eta PSE-EE) kontra bozkatu zuten. Jeltzaleek 20 bat zuzenketa partzial aurkeztu zituzten, eta horrez agin, osoko zuzenketa bat ere aurkeztu zuten.
Kaleratu duten oharrean zenbait kontu salatu dituzte. Lehenik, honako gogoeta bota dute, aparkaleku ordenantza berriaren gainekoa: “ez dugu ulertzen, udalerrian aparkalekua kudeatzeko ordenantza bat onartu berri zuen gobernuak berak ez zuenik aurrekontuan hura abian jartzeko partidarik, egoiliarrentzako txartelak jaulkitzeaz gain, besteak beste”, esan dute. Ezberdinen arteko akordioak lortzeko prestutasuna agertu zutela diote jeltzaleek, eta “zintzotasunez eta erantzukizunez” jokatu dutela. Aurkeztutako zuzenketak “guztiz egingarriak eta errealistak” direla diote. “Badakigu gobernuak gehiengo osoa duela, eta ez zaie ezertarako ere botoa eman behar, baina, horregatik, gure proposamenak ez ziren handiegiak, eta udal gobernuaren borondatea baino ez zen haiek onartzeko. Hala ere, egindako ahaleginak gorabehera, EH Bildu eta Ahal Dugu ez zetozen bat gure ikuspegiarekin, eta, zoritxarrez, ezin izan genuen gutxienekoen akordiorik lortu”. Aldi berean, eskerrak eman dizkiote Teo Alberro alkateari “negoziazioak izan zuen tonuagatik” eta, “lehen aldiz denbora luzean, benetan sumatu genuelako EH Bilduk eta Podemosek gutxieneko hitzarmen bat lortzeko interesa zutela”.
Jeltzaleen ustez “borondatearekin batera keinu jakin batzuk” egin behar direnez, abenduaren 23ko plenoan zuzenketa osoa erretiratu zuten jeltzaleek. “Botoaren zentzua ez zen aldatuko, baina uste dugu osoko zuzenketa kentzea etorkizunari begira gai garrantzitsuenetan akordioak lortzeko gure borondate irmoa argi uzteko modu bat dela. Udal politika ulertzeko dugun modua gure udalerriaren eta herritarren intereserako akordioak lortzeko lankidetzan aritzea da, behin baino gehiagotan erakutsi dugun bezala”, esan du Loreto Osa bozeramaileak.
EH Bilduren bozeramaileak jeltzaleek egindako keinua eskertu zutela nabarmendu du Osak, baina udal gobernuak kaleratutako oharrak “desengainatu eta urduritu” dituela diote. “Ez gara gai ulertzeko EH Bilduren bozeramaileak zergatik helarazten duen tonu bat osoko bilkuran eta alkateak guztiz kontrakoa adierazten du prentsa ohar baten bidez. Ez dakigu zer dela eta hartu duten jarrera hori, baina gaur goizean (abenduaren 26ko oharra da hau) edo gutaz barre egin dute edo argitaratutako kontakizunarekin gezurra esaten diete herritarrei”. Demagogia erabiltzea leporatu diote udal gobernuari azkenik, eta “existitzen ez den errealitate bat antzeztea, lan egin eta oposizioko taldeekin akordioak bilatu baino”. Honakoa esanez bukatu dute oharra: “Espero dugu Teo Alberro buru duen gobernu taldeak alde batera uztea autokonplazentzia eta ninguneoa oposizioari, eta serio hartzen hastea duela urte eta erdi Pasaiarekin hartutako konpromisoa eta erantzukizuna”.
